Erimbetovti tergeý izoliatorynda uryp-soqty degen aqparat jalǵan. Bul týraly QR IIM Qylmystyq atqarý júiesiniń baspasóz qyzmeti taratqan aqparattardan málim boldy, dep habarlaidy "Ult aqparat".
Baspasóz málimetterine qaraǵanda, aǵymdaǵy jylǵy 10 aqpanynda tergeý qamaýyndaǵy E.Erimbetovtiń anasy Almaty qalasynda ótken baspasóz konferentsiiasynda ulyn tergeý izoliatorynda uryp-soǵyp, azaptap jatyr dep shaǵymdanǵan.
Osyǵan bailanysty birqatar quqyq qorǵaýshylar E.Erimbetovpen betpe-bet kezdesý uiymdastyrdy.
Osylaisha, Adam quqyqtary jónindegi ulttyq ortalyqtyń jetekshisi S.Ospanov pen Almaty qalasyndaǵy Ulttyq aldyn alý tetiginiń jetekshisi I.Miroshnichenko atalǵan faktilerdi tekserip, anyqtaý úshin jáne qajetti kómekter kórsetý úshin tergeý izoliatoryna bardy.
Sonymen qatar, 2018 jylǵy 31 qańtarda osy mekemege Almaty qalasy Qoǵamdyq baiqaý komissiiasynyń tóraǵasy A.Janábilova keldi.
Al osy jyldyń birinshi aqpanynda sottalǵan E.Erimbetovpen tildesý úshin Adam quqyqtary jónindegi ýákil Jemis Turmaǵambetova men Adam quqyqtary jónindegi halyqaralyq biýronyń direktory Evgenii Jovtis baryp qaitty.
J.Turmaǵambetova men E.Jovtis tergeý qamaýyndaǵy E.Erimbetovtiń jaǵdaiyn tekserip, onymen SIZO qymetkerleriniń qatysýynsyz jasyryn sipattaǵy áńgimelesý ótkizdi.
Quqyq qorǵaýshylardyń qylmystyq-atqarý júiesi mekemelerine barý nátijesi boiynsha E.Erimbetovtiń tarapynan qandai da bir shaǵymdar bolǵan joq. Mekemeniń kommýnaldy-turmystyq jaǵdaiyn jaqsartý maqsatynda quqyq qorǵaýshylar tergeý izoliatorynyń ákimshiligine birqatar usynymdar berdi.
Esterińizge sala keteiik, osyǵan deiin Almatyda Sybailas jemqorlyqqa qarsy is-qimyl ulttyq biýrosynyń vedomstvoaralyq jedel tergeý toby men Ulttyq qaýipsizdik komitetiniń ókilderi bankir Muhtar Ábiliazovtyń sybailastary bolýy múmkin dep kúdik keltirilip otyrǵan 4 adamdy ustaǵandyǵyn habarlaǵan bolatynbyz.
