3 maýsymda Armeniia astanasy Erevanda oppozitsiia men politsiia qaqtyǵysyp, ondaǵan adam jaralandy. Narazylardyń kóńili biliktiń Taýly Qarabaqtaǵy daýly aimaqty sheshý talpynysyna tolmai otyr, dep habarlaidy Azattyq.
Juma kúni keshke politsiia qyzmetkerleri narazylardy premer-ministr Nikol Pashinian turatyn saiajaidan alastatý úshin qulaq tundyratyn granata qoldandy.
Densaýlyq saqtaý ministrligi 3 maýsymda túnde 50 adamnyń dárigerler kómegine júgingenin habarlady, 34-i – politsiia qyzmetkeri. Ministrliktiń aitýynsha, bir adamnyń jaǵdaiy aýyr.
4 maýsymda tańerteń taraǵan politsiia aqparatyna sáikes, 11 adam ustalǵan. Olar "politsiiaǵa kúsh qoldandy" jáne "politsiianyń zańdy talabyna baǵynbady" degen kúdikke ilingen. Tergeý amaldary bastalǵan.
3 maýsym kúngi narazylyq sáýirdiń aiaǵynan beri bastalǵan úkimetke qarsy narazylyqtardyń eń irisi. Narazylar "Taýly Qarabaq máselesine kelgende bilik Ázerbaijannyń yǵyna jyǵyldy" dep sanaidy. Olar premer-ministr Nikol Pashiniannyń otstavkasyn talap etip jatyr.
Sáýir aiynda Armeniia premer-ministri Nikol Pashinian men Ázerbaijan basshysy Ilham Áliev Taýly Qarabaq máselesin sheshý úshin beibit kelisim jobasyn qarastyra bastaǵan. Ortaq shekarany belgileitin komissiia da jýyrda jumysyn bastaýy tiis. Sodan beri elde narazylyq órshigen. Ótken aptada Pashinian men Áliev kezdesip, bolashaq kelisimdi talqylady.
Armeniia 2020 jyly kúzdegi soǵystan keiin Taýly Qarabaqtaǵy birqatar aýdandardy Ázerbaijanǵa qaitarǵan. Sodan beri oppozitsiia jii narazylyq ótkizip keledi.
Juma kúni basym bóligi Pashinian jaqtastarynan quralǵan armian parlamenti Taýly Qarabaq boiynsha málimdeme qabyldaǵysy kelgen oppozitsiianyń kezekten tys otyrysyn ótkizbei tastaǵan. Oppozitsiia málimdemege "Taýly Qarabaq – Ázerbaijan quramynda qalmaýy tiis" degen sóilem engizgisi kelgen. Al basqarýshy partiia músheleri parlament otyrysyna boikot jasap, qatyspaǵan. Sonyń saldarynan kvorým jinalmai, málimdeme qabyldanbady. Artynsha oppozitsiia qala ortalyǵyna jinalyp, narazylyq ótkizdi. Bastapqyda olar úkimet ǵimaratynyń jolyn jaýyp, artynsha eki shaqyrym jerdegi úkimet músheleriniń saiajaiyna qarai jyljyǵan. Politsiiamen qaqtyǵys sol arada bolǵan.
