Erekshe qajettilikteri bar azamattardy jumyspen qamtý – áleýmettik saiasattyń mańyzdy baǵyttarynyń biri. Bul másele tek jumys ornyn usynýmen ǵana shektelmeidi. Ol adamnyń qoǵamǵa tolyqqandy aralasýyna, ekonomikalyq táýelsizdigine, óz qabiletin júzege asyrýyna jáne ómir sapasyn arttyrýyna tikelei áser etedi. Sondyqtan memleket tarapynan múmkindigi shekteýli azamattardyń eńbek etýine qolaily jaǵdai jasaý – inkliýzivti qoǵam qalyptastyrýdyń basty talaptarynyń biri.
Qazaqstanda erekshe qajettilikteri bar azamattardy áleýmettik qorǵaý jáne jumyspen qamtý baǵytynda júieli jumystar júrgizilip jatyr. Bul sózimizdiń dáleli «Azamattarǵa arnalǵan úkimet» memlekettik korporatsiiasynyń Almaty qalasy Jetisý aýdany boiynsha halyqqa qyzmet kórsetý ortalyǵynda qyzmet atqaratyn – Gaýhar Ómirzaqova.
Ol 1993 jylǵy 12 jeltoqsanda Mańǵystaý oblysy Beineý aýdanynda dúniege kelgen. Bes jasynan bastap Aqtaý qalasynda turyp, osy qalada bilim alǵan. 2001–2012 jyldary Aqtaý qalasyndaǵy №15 jalpy bilim beretin mektepte oqyp, ony sátti támamdaǵan. Keiin 2012 jyly Almaty qalasyndaǵy M.Tynyshbaev atyndaǵy Qazaq kólik jáne kommýnikatsiialar akademiiasynyń qurylys fakýltetine túsip, 2016 jyly joǵary bilim alǵan. Bilimin odan ári jalǵastyryp, 2016–2018 jyldary atalǵan oqý ornynda magistratýrany aiaqtaǵan.
Eńbek jolyn Aqmola oblysy Atbasar qalasynda bastap, sol jyldary óz mamandyǵy boiynsha qyzmet atqarǵan. 2019 jyldyń 15 shildesinde «Azamattarǵa arnalǵan úkimet» memlekettik korporatsiiasynyń Aqtaý qalasy boiynsha filialyna maman bolyp jumysqa qabyldanǵan.
2021 jyldan beri para paýerlifting sportymen turaqty túrde ainalysady. Osy ýaqyt ishinde birneshe márte Qazaqstan Respýblikasynyń chempiony atanyp, joǵary sporttyq jetistikterge qol jetkizgen. 2026 jyly Tailandtyń Bangkok qalasynda ótken Aziia chempionatynda kúmis júldege ie bolǵan. Qazir Azamattarǵa arnalǵan úkimet» memlekettik korporatsiiasynyń Almaty qalasy Jetisý aýdany boiynsha halyqqa qyzmet kórsetý ortalyǵynyń operator zalynda jumys isteidi.
«Jumysymnyń ózi de adamdarmen tyǵyz qarym-qatynasta bolýdy talap etedi. Kún saiyn túrli máselemen kelgen azamattardy qabyldaimyz. Keńsede otyryp qana jumys istemeimin, adamdarmen tikelei sóilesemin, olardyń máselesin tyńdap, qoldan kelgenshe kómektesýge tyrysamyn.
Ár adam ártúrli bolady. Sondyqtan maman retinde sabyr saqtap, bárine birdei qurmetpen qaraýǵa tyrysamyn. Ózimde eshqandai kompleks bolǵan emes. Biraq qoǵamda syrtqy kelbetke qarap baǵa beretin adamdar kezdesedi. Ásirese kishkentai balalar qyzyǵýshylyqpen qarap qalatyn kezder bolady. Alaida men ony eshqashan teris qabyldamaimyn. Bul – tabiǵi nárse dep esepteimin.
Árine, alǵashynda azdap yńǵaisyzdyq seziletin. Biraq ýaqyt óte kele oǵan mán bermeýdi úirendim. Men úshin eń mańyzdysy – adamnyń syrtqy kelbeti emes, onyń isi men adamgershiligi.
Densaýlyǵyma qatysty ereksheligim bala kezden bar. Dárigerler naqty diagnoz qoiǵan. Biraq eshqashan ózimdi ózgelerden kem sezingen emespin. Kerisinshe, osy jaǵdai meni shyńdap, jigerimdi arttyrdy», – deidi Gaýhar Ómirzaqova.
Erekshe qyz ýniversitette oqyp júrgende sportpen tanysyp, bir kúni jattyqtyrýshy ony jeńil atletikaǵa shaqyrǵan. Keiin jattyqtyrýshysy onyń múmkindigin baiqap: «Jarystarǵa qatysýǵa bolady. Qujattaryńdy daiyndaiyq», – degen eken. Alaida ata-anasy oqýyn alańsyz aiaqtaǵanyn qalaǵan soń, aldymen diplom alyp, eńbekke aralasýdy oilaidy.
«2016 jyly ýniversitetti támamdadym. Diplom alar kezde maǵan Aqmola oblysy Atbasar qalasyna jumysqa joldama berildi. Dál sol ýaqytta jattyqtyrýshym taǵy da sportqa kelýge usynys jasady. Biraq men oqýymdy endi ǵana aiaqtap jatqandyqtan, aldymda tańdaý turdy: sportty jalǵastyrý nemese joldamamen jumysqa barý.
Sóitip, joldamany tańdap, Atbasarǵa jumysqa kettim. Degenmen Almatydan keter aldynda ýniversitettiń magistratýrasyna da qujat tapsyryp qoiǵan edim. Magistratýraǵa oqýǵa qabyldandym, biraq sonymen qatar jumysymdy da bastadym.
Atbasarda bir jarym jyl eńbek ettim. Ol jaqtyń jaǵdaiy maǵan asa unai qoiǵan joq. Shaǵyn qala bolǵandyqtan, múmkindigi de shekteýli edi. Bir jarym jyldan keiin Almatyǵa qaita kelip, magistrlik dissertatsiiamdy qorǵap, diplomymdy aldym.
Odan keiin biraz ýaqyt Almatyda jumys izdedim. Biraq qalaǵan jumysymdy taba almadym. Sóitip, 2018 jyldyń sońynda qaitadan Aqtaýǵa oraldym. Aqtaýǵa kelgen soń bir mekemege jumysqa ornalastym. Bastapqyda turaqty jumys bolǵanyna qýandym. Ózimdi sol jerde uzaq ýaqyt jumys isteitin shyǵarmyn dep oiladym. Biraq keiin basqa múmkindikterdi de qarastyra bastadym. Bir kúni test tapsyryp kóreiin dep sheshtim.
2019 jyldyń shilde aiynda test tapsyrdym. Kóp uzamai memlekettik qyzmetke jumysqa shaqyryldym. Alǵashynda bir bólimde shamamen bir jyldai qyzmet atqardym. Keiin karantin bastalyp, biraz ýaqyt Call-ortalyqta jumys istedik.
Karantin aiaqtalǵannan keiin, 2021 jyly qaitadan negizgi bólimge aýystym. Dál sol kezeńde bir áriptesim maǵan paralimpiadalyq sport týraly aityp, osy sport túrimen ainalysyp kórýge keńes berdi», – deidi Gaýhar Ómirzaqova.
Onyń aitýynsha, sportqa qaita oralý týraly oi burynnan bolǵan. Sondyqtan bul usynys túskende kóp oilanbastan kelisken. 2021 jyly jattyǵýdy qaita bastap, jańa jattyqtyrýshymen jumys isteýge kirisken. Sodan beri sport pen negizgi jumysyn qatar alyp keledi.
Ol birden jumysynan ketýge asyqpaǵanyn aitady. Sebebi turaqty tabys onyń ómirinde mańyzdy oryn alǵan. Al sportta eshqandai kepildik joq ekenin jaqsy túsingen. Chempion atanǵan jaǵdaida ǵana syiaqy beriledi, al oǵan deiingi jol uzaq ári qiyn. Sondyqtan bastapqyda sportty tek hobbi retinde qabyldaǵan.
Alaida ýaqyt óte kele sporttyń jai ǵana áýestik emes, ómiriniń ajyramas bóligine ainalǵanyn túsingen. Ol Qazaqstan chempiony atanyp, respýblikalyq jáne halyqaralyq deńgeidegi kóptegen jarystarǵa qatysqan. Sonymen qatar álemdik dodalarda da el namysyn qorǵap keledi.
Foto: Gaýhar Ómirzaqovanyń Instagram paraqshasynan
Ázirge álem chempionatynda júldeli orynǵa ie bolmaǵanymen, sońǵy bir jyldyń ishinde halyqaralyq dárejedegi sport sheberi normativin oryndaǵan. Onyń aitýynsha, bul – sporttyq jolyndaǵy eń mańyzdy jetistikteriniń biri.
«Keiin jattyqtyrýshymmen aramyzda belgili bir kelispeýshilikter týyndady. Jalpy, birge jumys istegen jyldarymyz jaman ótken joq. Biraq ýaqyt óte kele kózqarasymyz ekige bólindi. Sol kezde «bar nazarymdy tek sportqa aýdaramyn» degen sheshim qabyldadym. Alaida jattyqtyrýshymmen aradaǵy túsinispeýshilik kúsheie tústi. Ekeýimizdiń aramyzda birneshe ret ashyq áńgime boldy. Ol maǵan óz pikirin aitty, men de óz oiymdy jetkizdim.
Sol ýaqytta Qazaqstan quramasynyń bas jattyqtyrýshysymen bailanysqa shyqtym. Jaǵdaidy tolyq túsindirdim. Ol kisi meni tyńdap, qoldaý bildirdi. Dál sol kezde 2025 jyly ótetin álem chempionatyna daiyndyq júrip jatqan bolatyn.
Burynǵy jattyqtyrýshym meniń álem chempionatyna qatysýyma qarsy boldy. «Nátijeń joq, áli erte» degen pikir aitty. Biraq bizdiń sportta Olimpiada tsikli tórt jylǵa esepteledi. Barlyq sportshy reitingtik jarystarǵa qatysyp, upai jinaýy kerek. Sondyqtan halyqaralyq jarystarǵa shyǵý óte mańyzdy edi.
Qazaqstan quramasynyń bas jattyqtyrýshysy meni qoldap, jarystarǵa qatysýyma múmkindik jasady. Sonyń arqasynda álem chempionatyna joldama aldym. Bul men úshin úlken jetistik boldy. Álemdik dodada besinshi orynǵa turaqtadym. Bul nátije óz múmkindigimdi dáleldep, durys baǵytta kele jatqanymdy kórsetti.
Osydan keiin Almatyǵa qaita oraldym. Munda burynnan tanys adamdarym, aǵam, dostarym bar edi. Eń bastysy – Qazaqstan quramasynyń bas jattyqtyrýshysy osynda jumys isteidi. Sondyqtan jattyǵýǵa da, jarystarǵa daiyndalýǵa da barlyq múmkindik ashyldy», – deidi Gaýhar Ómirzaqova.
Qazirgi tańda ol Almaty qalasynyń atynan óner kórsetedi. Almaty quramasyna aýysqannan keiingi alǵashqy jarysynda jeńiske jetip, keiin Tailandtyń Bangkok qalasynda ótken Aziia chempionatynda kúmis júldeger atanǵan. Onyń aitýynsha, bul jetistik ózine úlken senim syilap, eńbeginiń aqtalǵanyn kórsetti.
Sportshy alǵashqy halyqaralyq jarystarǵa óz qarajatyna qatysyp, jumysy men sportty qatar alyp júrgenin aitady. Qazir áriptesteri men basshylyǵy onyń jetistikterin qoldap, joǵary baǵalaidy.
Aldaǵy ýaqytta ol sport salasynda qalyp, jastardy jattyqtyrýdy jáne óz tájiribesin keiingi býynǵa úiretýdi josparlap otyr. Onyń aitýynsha, sport ómiriniń ajyramas bóligine ainalǵan.
Foto: Gaýhar Ómirzaqovanyń Instagram paraqshasynan
Aqbota Musabekqyzy
