Túrkiia prezidenti Rejep Taiip Erdoǵan Ystambulda bolǵan teraktiden adamdardyń qaitys bolǵanyn rastady, - dep habarlaidy Anadolu agenttigi.
Agenttiktiń málimetinshe, Erdoǵan terroristik akt qaýipsizdik qyzmetindegiler men beibit turǵyndarǵa qarsy uiymdastyrylǵanyn aitty. Sonymen qatar, prezident Túrkiianyń terroristik uiymdarmen áli de kúresip jatqanyn aitty. Erdoǵan Túrkiianyń bul lańkesterdi jaýapkershilikke tartatynyn aityp ótti.
Al RIA Novosti basylymynyń málimetinshe, Erdoǵan Ystambulda bolǵan teraktini uiymdastyrýshylardyń barynsha kóp adamnyń kózin joiǵysy kelgenin aitty. "Búgin túnde biz taǵy da terroristik áreketterdiń kýágeri boldyq. Olardyń fýtboldan keiin birden terakt uiymdastyrýdaǵy maqsaty barynsha kóp adamnyń kózin joiý kerek bolǵany túsinikti. Ókinishke qarai, teraktiden zardap shekkendermen qosa, qaza tapqandar da bar", - dep keltiredi agenttik Túrkiia prezidentiniń sózderin.
Eske sala keteiik, búgin túnde Ystambulda birden eki terakt bolyp, qaza tapqandardyń sany 29 adamǵa jetken bolatyn. Oqiǵa ornyndaǵy jergilikti telearna málimetinshe, politseiler otyrǵan avtobýstyń mańynda minalanǵan kólik jarylyp ketken. Jarylystan zardap shekkenderdiń barlyǵy - politseiler.
