Túrkiia Prezidenti Rejep Erdoǵan reseilik C-400 zymyran júiesi Túrkiiaǵa shildeniń basynda jetkiziletinin málimdedi. Bul týraly Túrkiia aqparat quraldary habarlady.
Quny shamamen 2,5 milliard dollar bolatyn reseilik C-400 áskeri zymyran keshenin satyp alý týraly kelisimge Máskeý men Ankara 2017 jyly qol qoiǵan. Túrkiiaǵa reseilik áskeri zymyran keshenderi 2020 jyly jetkiziledi dep josparlanǵan. Biraq eki tarap alǵashqy keshendi 2019 jyldyń shilde aiynda jetkizý týraly kelisken.
Bul kelisim Túrkiia men AQSh arasyndaǵy qarym-qatynasqa salqynyn tigizdi. Vashington NATO paidalanyp kele jatqan F-35 áskeri ushaǵy jaily qupiia derek Kremldiń qolyna túsýi múmkin dep qaýiptenedi. AQSh sonymen birge C-400 kesheni NATO-nyń zymyranǵa qarsy qorǵanys júiesimen sáikes kelmeitinin de alǵa tartady. AQSh senaty eger Túrkiia C-400 keshenin ornalastyrsa, oǵan qarsy sanktsiia salatynyn eskertken.
Buǵan deiin AQSh qorǵanys ministri mindetin oryndaýshy Patrik Shenahen eger Ankara reseilik S-400 júiesin satyp alýdan bas tartpasa, F-35 áskeri ushaqtaryn jetkizý baǵdarlamasynan Túrkiianyń shyǵyp qalatynyn aitqan.
