Túrki tildes memleketterdiń yntymaqtastyq keńesiniń 8-shi sammiti 2021 jyldyń 12 qarashada Ystanbulda ótedi. Bul týraly Túrki keńesiniń beiresmi sammiti barysynda Túrkiia Prezidenti Rejep Taiip Erdoǵan aitty, dep habarlaidy "Ult aqparat".
«2016 jyldyń qyrkúieginde Qyrǵyzstannyń Sholpan ata qalasynda Túrki keńesiniń 6-shy sammiti ótken bolatyn. Sol jiynda 4-shi Dúniejúzilik kóshpendiler oiynyn Túrkiiada ótkizý týraly sheshim qabyldaǵan edik. Eger sizder ruqsat etseńizder, bul oiyndardy myna koronavirýs pandemiiasyna bailanysty keiinge qaldyryp, 2022 jyly ótkizbek oiymyzda bar», - dedi Túrkiia Prezidenti.
Sonymen qatar Rejep Taiip Erdoǵan Túrki keńesine múshe elderdiń basshylaryn Antaliia diplomatiialyq forýmyna, TMYK-tyń 8-shi sammitine shaqyrdy.
«Antaliia diplomatiialyq forýmy maýsym aiynyń ishinde ótedi. Forým túrli salada pikir almasý alańy retinde jumys isteidi. Sonymen qatar Túrki keńesiniń 8-shi sammitin 2021 jyldyń 12 qarashasynda Ystanbulda ótkizemiz dep úmittenemin», - dedi Túrkiia basshysy.
Osy rette Qazaqstan Prezidenti Qasym-Jomart Toqaev túrki álemniń bolashaǵyna qatysty ózekti máselelerdi kóterip, salmaqty pikir aitqan Túrkiia Prezidentine rizashylyǵyn bildirdi.
«Sizdiń elińiz túrki dúniesin jańǵyrtýǵa jáne ony zaman talabyna sai jańǵyrtýǵa orasan zor úles qosyp kele jatqany belgili. Qazaqstan Sizdiń bastamalaryńyzdy qoldaidy», - dedi Memleket basshysy.
