Foto: REUTERS/Presidential Press Office
Túrkiia prezidenti Rejep Taiyp Erdoǵan Ankara Finliandiianyń NATO-ǵa kirýin qoldap, Shvetsiianyń músheligine qarsy bolýy ábden múmkin ekenin málimdegen.
Keiingi aptada Túrkiia men Shvetsiianyń qarym-qatynasy nasharlap ketti. Ankara "Stokgolm NATO-ǵa qosylý jónindegi byltyrǵy kelisimdi oryndaýǵa qulyqsyz boldy" dep aiyptaidy. Onyń ústine, Shvetsiiadaǵy Qurandy órteý aktsiiasynan keiin syn kúsheie tústi.
Finliandiia men Shvetsiia NATO-ǵa kirýge byltyr - Ýkrainadaǵy soǵys bastalǵannan keiin, mamyr aiynda ótinish bergen. Eki kórshi memleket syrtqy saiasatta kóp jyl beitarap bolyp kelgen. Endi NATO-ǵa kirý kelisimin ózara úilestirýge ýaǵdalasqan.
Erdoǵan sailaýshylar aldynda sóilegen sózinde: "Qajet bolsa, Finliandiiadan góri, Shvetsiiaǵa qatysty sheshim basqa bolady. Shvetsiia bul sheshimge tańǵalary sózsiz" dedi.
Shvetsiianyń NATO-ǵa qosylý múmkindigine qatysty sóilegen Erdoǵan Stokgolmge Qurandy órteýge qatysty emes, terrorizm aiyby taǵylǵan ondaǵan kúrd belsendisin elge qaitarýǵa qatysty talap qoidy.
"NATO-ǵa kirgińiz kelse, bizge sol terroristerdi berińizder" - dedi Túrkiia prezidenti.
Shvetsiia men Finliandiianyń NATO-ǵa kirýi úshin odaqtyń barlyq múshesi – 30 memleket kelisim berýi kerek. 28 el kelisim berip qoidy, endigi qalǵany – Túrkiia men Vengriia. Vengriia jaqynda kelisim beredi degen málimet bar.
