Latynǵa kóshý arqyly tilimizdiń ózindik ereksheligine súiengen álipbiimiz jasalady. Mundai pikirdi búgin Aqordada ótip jatqan Rýhani jańǵyrý jónindegi ulttyq komissiianyń ekinshi otyrysy aiasynda BAQ ókilderine suhbat bergen A.Baitursynov atyndaǵy Til tilimi institýtynyń direktory Erden Qajybek bildirdi, dep habarlaidy QazAqparat.
«Barlyǵymyz aqyldasa otyryp, ortaq biryńǵai latyn álibiin daiyndaýdamyz. Jyldyń sońyna deiin bekitemiz. Kelesi jyldan bastap asyqpai tiianaqty túrde iske asyrýǵa kirisemiz. 2025 jylǵa deiin osynaý úlken mańyzdy úrdisti aiaqtaýǵa tiispiz», - dep atap ótti ol.
Onyń aitýynsha, latyn álipbiine qatysty tilshi mamandar arasyndaǵy kelispeýshilik óte az desek bolady.
«Biraq, álipbi eldi eleń etkizerlik másele bolǵannan keiin kez kelgen saýatty adamnyń ózindik usynysy bar. Jalpy, bul rettegi eń basty ustanym - ishki máselemiz, qazaq halqynyń tańdaýy. Tildiń ózine ikemdelgen álipbii bolady. Keibireýler álipbi aýystyrý árip - aýystyrý dep oilaidy. Olai emes, bul tek qana 1-2 paiyzy ǵana, ońai másele. Eń bastysy tilimizdiń búkil zańdylyqtaryn óziniń tabiǵatyna sai jasap shyǵarýymyz kerek», - dedi Erden Qajybek.
Institýt direktorynyń sózine qaraǵanda, búgingi kúni latyn álipbiine kóshý jónindegi jumys tobyna usynystar óte kóp túsýde.
«Olardyń barlyǵyn saraptaityn jumys toby jasaqtalǵan. Topqa tilshi mamandar, aǵylshyn, kirill, kompiýter tiliniń mamandary kirdi. Tilimizde 26-28 dybys bar. Sol dybystarǵa sáikes áripter tańdalady jáne bul árip tańdaý máselesinde eń bastysy ózimizdiń rýhani jańǵyrýymyzǵa negizgi tiregi tilimiz bolýy kerek. Osy turǵydan qarastyrylady. Árine, jahandaný, qazirgi damý, innovatsiia protsesterine ilesý úshin jáne memlekettik tilimizdi jan-jaqty memlekettik ári qoǵamdyq salalarda damytý úshin bul aýadai qajet is», - dedi ol.
Erden Qajybektiń aitýynsha, jalpy álipbide tildegi dybystar sanynan áripter sany sál az bolady.
«Mysaly bizde qazir 28 dybys bolsa, árip sany 42. Al negizinde 28 bolýy kerek. Kezinde latyn álipbiine kóshkenimizde 28-29 árip boldy. A.Baitursynovtyń tóte jazýynda da 28-29 árip bolǵan edi. Bizde de yqshamdalǵan, tilimizdiń ózindik ereksheligine súiengen álipbiimiz bolady», - dedi institýt basshysy.
.jpg)