«AMANAT» partiiasynyń Atqarýshy hatshysy Ashat Oralov jumys saparymen Almaty qalasyna keldi, dep habarlaidy "Ult aqparat".
Partiia baspasóz qyzmetiniń málimetinshe, Ashat Oralov qalalyq filialdyń kezekten tys konferentsiiasyna qatysqan. Osy jiynda delegattar «AMANAT» partiiasy filialynyń jańa tóraǵalyǵyna Almaty qalasynyń ákimi Erbolat Dosaevty sailady.
Partiianyń Atqarýshy hatshysy filial jańa basshylyǵynyń aldynda partiiany modernizatsiialaýdy eskere otyryp, jumysty jandandyrý jáne sailaýaldy mindettemelerdiń sapaly oryndalýyn baqylaý mindetteri turǵanyn atap ótti.
«Ózderińiz biletindei, Memleket basshysy, «AMANAT» partiiasynyń Tóraǵasy Qasym-Jomart Toqaev halyqpen keri bailanys jasaýda transparenttilikti arttyryp, qoǵamnyń barlyq ókilderimen jumysty kúsheitý boiynsha mindetter qoidy. Partiianyń barlyq sailaýaldy ýádelerin – azamattardyń talap-tilekterin, «amanattaryn» oryndaý negizgi basymdyq bolyp qala beredi. Bul rette biz memlekettik organdardan tsifrlar talap etetin tájiribeden alshaqtaýymyz kerek. Azamattardyń pikirlerin eskere otyryp, baǵdarlamanyń tarmaqtaryn naqty iske asyrýǵa yqpal etetin proaktivti formatqa aýysýymyz qajet», - dep atap ótti Ashat Oralov.
Osy kúni Ashat Oralov ziialy qaýym ókilderimen jáne partiia ardagerlerimen de kezdesti. Olardyń ishinde áigili akter, teatr jáne kino rejisseri Asanáli Áshimov, Qazaqstan Jazýshylar Odaǵy tóraǵasynyń orynbasary Aqberen Elgezek, aqyn Júrsin Erman, jazýshy Smaǵul Elýbai jáne t.b. bar.
Ashyq pikir almasý barysynda ziialy qaýym ókilderi partiia qyzmetin jetildirý jónindegi óz pikirlerin ortaǵa salyp, Memleket basshysy, Partiia Tóraǵasy Qasym-Jomart Toqaevtyń halyqtyń ál-aýqatyn arttyrýǵa jáne Jańa Qazaqstandy qurýǵa baǵyttalǵan bastamalaryna qoldaý bildirdi.
Jumys saparynyń alǵashqy kúni Atqarýshy hatshy qalalyq máslihattaǵy «AMANAT» partiiasy fraktsiiasynyń múshelerimen keńes ótkizdi. Ol osy jiynda depýtattarǵa jumysty kúsheitýdi jáne qalalyq sailaýaldy baǵdarlamanyń oryndalýyna sapaly baqylaý uiymdastyrýdy taǵy bir ret tapsyrdy.
«Almatylyqtarǵa bergen barlyq ýádelerdi oryndaý qajet. Baqylaýdy kúsheitý maqsatynda Almaty qalasyna arnalǵan sailaýaldy baǵdarlamanyń áleýmettik tusyn Biýro múshelerine, al jol kartasynyń indikatorlaryn partiia óńirlik filialy Saiasi keńesiniń múshelerine bekitý qajet», - dep atap ótti Ashat Oralov.
