Alqa biler Erasyl Áýbákirovtiń ólimi boiynsha iste úkim shyǵardy, - dep habarlaidy Tengrinews.kz tilshisi. Búgin elorda sotynda atyshýly is boiynsha sot aiaqtaldy.
Sýdia Ashat Áshirbekov pen alqa biler keńes bólmesinen shyǵyp, osy is boiynsha úkim shyǵardy.
Nurbek Ájimbai múlki tárkilene otyryp, 20 jylǵa bas bostandyǵynan aiyryldy. Andrei Tihonenko 16 jylǵa bas bostandyǵynan aiyryldy, al Vitalii Sherstnev 11 jylǵa sottaldy.
Bir ai buryn, 7 qyrkúiekte Astanada atyshýly iske qatysty sot bastalǵan bolatyn. 23 jastaǵy Erasyl Áýbákirovti óltirdi degen kúdikpen sot aldyna úsh adam keldi: Nurbek Ájimbai, Vitalii Sherstenev jáne Andrei Tihonenko. Olarǵa "Uiymdasqan qylmystyq top qurý jáne oǵan basshylyq etý", "Adamdy bostandyǵynan zańsyz aiyrý", "Seksýaldyq sipattaǵy zorlyq áreketteri", "Adam óltirý" jáne "Bopsalaý" baptary boiynsha aiyp taǵyldy.
Bul iste bastapqyda Aian Meiirbaev kúdikti bolǵan edi. Oǵan qatysty qýdalaý qylmys quramynyń joq bolýyna bailanysty toqtatylǵan edi. Ol tergeý izoliatorynan bosap shyqty.
Eske salaiyq, biyl aqpanda Astanada meditsinalyq ýniversitettiń altynshy kýrsynda oqityn Erasyl Áýbákirov joǵalyp ketken bolatyn. Ol Saryarqa - Seifýllin qiylysyndaǵy úiinen sol jaǵalaýǵa qarai shyǵyp ketip, tabylmaǵan edi. Keiin, 10 aqpanda onyń máiiti zorlyq belgilerimen tabylǵan.
