Volonterlerdi qoǵamdyq paidaly jumysqa tartý tehnologiialaryn qamtityn nusqaýlyqtar ázirlendi. Bul jaiynda Májilis depýtattarynyń saýalyna orai QR Premer-Ministriniń orynbasary Eraly Toǵjanovtyń jaýabynda aitylǵan, dep habarlaidy "Ult aqparat".
«Búginde Aqparat jáne qoǵamdyq damý ministrligi «Ulttyq volonterler jelisi» Zańdy tulǵalar birlestigimen birge volonterlerdi qoǵamdyq paidaly jumysqa tartý tehnologiialaryn qamtityn nusqaýlyqtar men ádistemelik quraldar ázirledi. Atalǵan nusqaýlyqtar barlyq óńirlerge joldanyp, óńirlik front-ofisterge paidalaný úshin taratyldy. Sondai-aq biryńǵai qazvolunteer.kz platformasynda ornalastyryldy. Búginde platformada 47 myńǵa jýyq volonter, 3 200-den astam volonterlik uiym resmi túrde tirkelip, 1 000-nan astam jobany júzege asyrýǵa múmkindik alyp otyr», - dedi Eraly Toǵjanov.
Budan bólek vitse-premerdiń aitýynsha, ázirlenip jatqan Volonterlikti damytýdyń 2021-2023 jyldarǵa arnalǵan Jol kartasynda tótenshe jaǵdai kezinde jáne áleýmettik baǵyttaǵy jumystarǵa halyqty erikti qyzmetke jumyldyrý maqsatynda SMS habarlama taratý júiesin engizý, Telegram jelisinde arnaiy bot-kanal ashý máseleleri qarastyrylǵan.
«Qoldanystaǵy «Volonterlik qyzmet týraly» Qazaqstan Respýblikasy Zańynyń 12-babynyń 6-tarmaǵyna sáikes, volonter volonterlik qyzmetti uiymdastyrýshydan jáne volonterlik uiymnan usynym hattar alýǵa quqyly. Ázirlenip jatqan zań jobasy (volonterlik qyzmet pen qaiyrymdylyqty qoldaý tetikterin jetildirýge baǵyttalǵan zań jobasy) aiasynda osy normanyń mazmunyn volonterlik uiymnyń volonterge usynym hat berý mindetimen tolyqtyrý kózdelip otyr. Sonymen qatar, Jol kartasy aiasynda volonterlik uiymdar bastamalaryn memlekettik áleýmettik tapsyrys jáne memlekettik granttar negizinde júieli qoldaý, biznes ókilderi men jeke tulǵalardyń volonterlik jobalarǵa qatysýyn yntalandyrý, osy saladaǵy halyqaralyq yntymaqtastyqty keńeitý josparlanyp otyr. Jalpy júrgizilip jatqan jumystar elimizdegi volonterlik qozǵalystyń damýyna oń yqpalyn tigizetin bolady», - dedi Úkimet basshysynyń orynbasary.
