Elordada anyqtalǵan koronavirýstyń «delta» shtamyna genomdyq zertteý tolyq aiaqtalǵan joq. Bul týraly QR Premer-Ministriniń orynbasary Eraly Toǵjanov aitty, dep habarlaidy QazAqparat.
«Búgingi kúni Qazaqstandaǵy epidemiologiialyq jaǵdai turaqty. Sońǵa aida koronavirýs infektsiiasymen aýrý deńgeii 1,7 esege tómendedi. Statsionarlyq emdelýdegi naýqastar sany 2,1 esege, al ambýlatorlyq emdelýdegi naýqastardyń sany 1,7 esege azaidy. Infektsiialyq tósek-oryndardyń qory jetkilikti. Olardyń búginde 25 paiyzy, al reanimatsiialyq tósek-oryndardyń 21 paiyzy ǵana qoldanysta. Buǵan halyqtyń vaktsinatsiialaý is-sharalary men epidemiiaǵa qarsy qabyldanǵan naqty sheshimderdiń bári yqpal etti dep aitýǵa tolyqtai negiz bar», - dedi Úkimet basshysynyń orynbasary Ortalyq kommýnikatsiialar qyzmetindegi brifingte.
Degenmen, onyń aitýynsha, búginde álemde aýrý sanynyń kezekti ret artýy baiqalýda. Onyń ishinde aýrýdyń jańa shtammdary da kóptep taralýda.
«Nur-Sultan qalasynda COVID-19-ben aýrý deńgeiiniń ósýine bailanysty virýstyń mýtatsiiaǵa ushyraý yqtimaldyǵyna qatysty skrining júrgizilgen. Aldyn ala nátijeleri virýs mýtatsiiasynyń anyqtalǵanyn jáne ol «delta» shtamyna, iaǵni Úndi shtamyna tán ekendigin kórsetti.
Densaýlyq saqtaý ministrliginiń jýyrda jasaǵan málimdemesinde aitylǵandai, túpkilikti qorytyndy tolyq genomdyq zertteý aiaqtalǵannan keiin belgili bolady. Bul shtamm kórshi elderde de anyqtalǵan. DDSU málimetterine sáikes, «delta» shtamy búginde álemniń 74 elinde anyqtalyp otyr», - dedi Eraly Toǵjanov.
