Memleket basshysynyń tapsyrmalaryn oryndaý maqsatynda Premer-Ministrdiń orynbasary Eraly Toǵjanov ǵylymdy damytý máseleleri jóninde keńes ótkizdi. Bul týraly primeminister.kz saity habarlady.
Keńeske Prezident Ákimshiliginiń, salalyq memlekettik organdardyń, «Atameken» UKP, «Samuryq-Qazyna» UÁQ» AQ jáne ǵylymi qoǵamdastyqtyń ókilderi qatysty.
Vitse-premer ǵylymnyń óndirispen ózara bailanysynyń mańyzdy rólin, halyqtyń eńbek tabysyn ósirýdegi ǵylymnyń úlken áleýetin atap ótti. Halyqtyń tabysyn arttyrý baǵdarlamasynyń jobasynda 1700 jańa jumys ornyn qura otyryp, ǵylymi jáne ǵylymi-tehnikalyq qyzmetti kommertsiialandyrýdyń 200-ge jýyq jobasyn iske asyrý kózdelgen.
Toǵjanov halyqtyń eńbek tabysyn arttyrýǵa ǵylymnyń úlesin kúsheitý jónindegi sharalardy qosymsha pysyqtaýdy tapsyrdy.
Keńeste ǵalymdardy qoldaý, ǵylymi infraqurylymdy jańǵyrtý, ǵylym, óndiris pen biznestiń ózara is-qimylyn keńeitý jónindegi naqty sharalardy qamtityn ǵylymdy damytýdyń 2022-2026 jyldarǵa arnalǵan tujyrymdamasynyń jobasy talqylandy.
Sondai-aq, Bilim jáne ǵylym ministrligi tehnikalyq ǵylymdardy, injiniring pen tehnologiialardy damytýǵa basa nazar aýdara otyryp, 951 perspektivaly ǵylymi ázirlemelerdiń tizimin tanystyrdy.
Budan basqa, salalyq memlekettik organdar janynan ǵylymi-tehnikalyq keńester qurý arqyly jer qoinaýyn paidalanýshylardyń ǴZTKJ-ǵa aýdarymdaryn bólý tetigi qaraldy.
Keńeske qatysýshylardyń usynystaryn tyńdaǵan Premer-Ministrdiń orynbasary zertteýlerdiń óndiristik ǵylymǵa áserin kúsheitý, halyqaralyq tehnologiialyq kompaniialarda qyzmet etetin jetekshi ǵalym otandastardy tartý, tájiribelik-konstrýktorlyq ázirlemelerdiń úlesin arttyrý, ekonomika men áleýmettik salanyń naqty mindetterin sheshý úshin ǵylymi institýttardyń, kásiporyndardyń zerthanalyq jabdyqtardy birlesip paidalanýy boiynsha sharalar qabyldaýdy tapsyrdy.
