QR Premer-Ministriniń orynbasary Eraly Toǵjanov bilim jáne ǵylym salasyndaǵy ótken jylǵy basty jetistikterdi atady, dep habarlaidy QazAqparat.
«Bilim jáne ǵylym salasynda ótken jyly aitarlyqtai jetistikterge qol jetkizildi. 2021 jyly bilim sapasyn arttyrýǵa arnalǵan «Bilimdi ult» jobasy qabyldandy. 45,2 myń orynǵa arnalǵan 534 balabaqsha ashyldy. 1 015 mektep jańǵyrtýdan ótti, onyń ishinde 921-i aýyl mektepteri. Kolledjderge mamandardy daiarlaýǵa arnalǵan memlekettik tapsyrys 3,5 myńǵa ulǵaidy. Joǵary oqý oryndary grantynyń sany 10 paiyzǵa artyp, 56 myń grantty qurady», - dedi Úkimet basshysynyń orynbasary Bilim jáne ǵylym ministrliginiń keńeitilgen alqa otyrysynda.
Onyń atap ótýinshe, Memleket basshysy Qasym-Jomart Toqaevtyń tapsyrmasyna sáikes ázirlengen «Úzdiksiz bilim berý» tujyrymdamasy bekitildi. Stýdentterdiń shákirtaqysy 20 paiyzǵa ósti. 10 myń oryndyq 49 jataqhana paidalanýǵa berildi.
«Pandemiiaǵa qarsy QazVac otandyq vaktsinasy ázirlendi. Jas ǵalymdarǵa «Jas ǵalym» jobasy aiasynda 1 myń grant bólindi. Irgeli zertteýler men tikelei qarjylandyrýdy kózdeitin ǵylym máseleleri boiynsha arnaýly zań qabyldandy. Osy jetistikterdi atap óte otyryp, bilim salasyndaǵy kez kelgen nátije balalardyń bilim sapasy arqyly ata-analardyń, jumys berýshilerdiń bilim deńgeiine qanaǵattanýy arqyly baǵalanýy qajet ekendigin atap ótkim keledi»,- dedi Eraly Toǵjanov.
