قر پرەمەر-مينيسترٸنٸڭ ورىنباسارى ەرالى توعجانوۆ بٸلٸم جەنە عىلىم سالاسىنداعى ٶتكەن جىلعى باستى جەتٸستٸكتەردٸ اتادى, دەپ حابارلايدى قازاقپارات.
«بٸلٸم جەنە عىلىم سالاسىندا ٶتكەن جىلى ايتارلىقتاي جەتٸستٸكتەرگە قول جەتكٸزٸلدٸ. 2021 جىلى بٸلٸم ساپاسىن ارتتىرۋعا ارنالعان «بٸلٸمدٸ ۇلت» جوباسى قابىلداندى. 45,2 مىڭ ورىنعا ارنالعان 534 بالاباقشا اشىلدى. 1 015 مەكتەپ جاڭعىرتۋدان ٶتتٸ, ونىڭ ٸشٸندە 921-ٸ اۋىل مەكتەپتەرٸ. كوللەدجدەرگە مامانداردى دايارلاۋعا ارنالعان مەملەكەتتٸك تاپسىرىس 3,5 مىڭعا ۇلعايدى. جوعارى وقۋ ورىندارى گرانتىنىڭ سانى 10 پايىزعا ارتىپ, 56 مىڭ گرانتتى قۇرادى», - دەدٸ ٷكٸمەت باسشىسىنىڭ ورىنباسارى بٸلٸم جەنە عىلىم مينيسترلٸگٸنٸڭ كەڭەيتٸلگەن القا وتىرىسىندا.
ونىڭ اتاپ ٶتۋٸنشە, مەملەكەت باسشىسى قاسىم-جومارت توقاەۆتىڭ تاپسىرماسىنا سەيكەس ەزٸرلەنگەن «ٷزدٸكسٸز بٸلٸم بەرۋ» تۇجىرىمداماسى بەكٸتٸلدٸ. ستۋدەنتتەردٸڭ شەكٸرتاقىسى 20 پايىزعا ٶستٸ. 10 مىڭ ورىندىق 49 جاتاقحانا پايدالانۋعا بەرٸلدٸ.
«پاندەميياعا قارسى QazVac وتاندىق ۆاكتسيناسى ەزٸرلەندٸ. جاس عالىمدارعا «جاس عالىم» جوباسى اياسىندا 1 مىڭ گرانت بٶلٸندٸ. ٸرگەلٸ زەرتتەۋلەر مەن تٸكەلەي قارجىلاندىرۋدى كٶزدەيتٸن عىلىم مەسەلەلەرٸ بويىنشا ارناۋلى زاڭ قابىلداندى. وسى جەتٸستٸكتەردٸ اتاپ ٶتە وتىرىپ, بٸلٸم سالاسىنداعى كەز كەلگەن نەتيجە بالالاردىڭ بٸلٸم ساپاسى ارقىلى اتا-انالاردىڭ, جۇمىس بەرۋشٸلەردٸڭ بٸلٸم دەڭگەيٸنە قاناعاتتانۋى ارقىلى باعالانۋى قاجەت ەكەندٸگٸن اتاپ ٶتكٸم كەلەدٸ»,- دەدٸ ەرالى توعجانوۆ.
