QR Premer-Ministriniń orynbasary Eraly Toǵjanov asharshylyq qurbandarynyń tizimin jasaý jumystaryna qatysty túsinik berdi, dep habarlaidy QazAqparat.
Ortalyq kommýnikatsiialar qyzmetindegi baspasóz máslihatynda ǵalymdar saiasi qýǵyn-súrgin qurbandaryn tolyq aqtaý jumystary aiasynda asharshylyq qurbandarynyń tizimin jasaý jumystaryn qolǵa alý usynystaryn aityp júrgendigi týraly sóz boldy. Sondai-aq, komissiianyń asharshylyq qurbandarynyń tolyq tizimin jasaýǵa kirisý múmkindigi suralǵan bolatyn.
Óz kezeginde E.Toǵjanov HH ǵasyrdyń 20-30 jyldaryndaǵy Qazaqstandaǵy asharshylyq kezeńi zertteýmen tikelei qamtylatynyn aitty. Iaǵni bul jumys komissiianyń negizgi baǵyttarynyń biri.
«Degenmen tolyq tizim jasaýda kúrdeli máseleler de barshylyq. Elimizdegi azamattardy qujattandyrýdyń máselesi 35-36 jyldarda ǵana bastalǵanyn eskerýimiz kerek. Bul turǵyda derekterdi tolyqtai qamtý ońai emes. Atap aitqanda, ǵalymdardyń arasynda da derekter ártúrli. Sondyqtan olardyń barlyǵyn komissiia óz jumysy barysynda naqtylaidy degen senimdemiz», - dedi Úkimet basshysynyń orynbasary.
Sonymen qatar E.Toǵjanov HH ǵasyrdyń sol kezeńinen kýágerlerdiń qalmaýy zertteý jumystaryn qiyndatatynyn aitty.
«Kýágerlerdiń ózi joqtyń qasy. Sondyqtan bul turǵyda komissiia, ǵalymdar tiisti jumystardy atqarady. Óńirlerdi aralaý kerek bolady», - dedi Premer-Ministrdiń orynbasary.
