Premer-Ministrdiń orynbasary Eraly Toǵjanov 2020 jyly koronavirýstyń taralýy jaǵdaiynda ustazdar men dárigerlerdiń eren eńbegin atap ótti, dep habarlaidy "Ult aqparat".
«Ótken jyl ońai bolmady. Qoǵamnyń sana-seziminde byltyr úlken ózgerister boldy desem artyq emes dep oilaimyn. Ustazdarymyzdyń orny erekshe ekenin búkil el qaitadan qarap, túsindi. Qiyn kezeńderde bizdiń ustazdarymyzdyń naqty jasaǵan eren eńbegin barsha halyq biledi», - dedi E. Toǵjanov QR Aqparat jáne qoǵamdyq damý ministrliginiń keńeitilgen alqa májilisinde.
Sonymen qatar ol dárigerlerdiń mańyzdy qyzmetine erekshe toqtalyp ótti. Qiyn kezeńde kóptegen azamattardyń tikelei atsalysqanynyń arqasynda aýqymdy ister atqaryldy.
«Prezident Qasym-Josmart Kemelulynyń tikelei tapsyrmalary arqasynda, sondai-aq qabyldanǵan sheshimderge orai jalpy jaǵdaidy baqylaýda ustaýǵa tolyqtai múmkin boldy. Ásirese, byltyr jaz ailarynda biraz qiyndyqty birge ótkerdik. Atap aitqanda tutas el bolyp sheshim qabyldaǵan qadamdardy júzege asyrǵan jerde ǵana naqty nátije bolady. Qudaiǵa shúkir, jaǵdai qalypty ári turaqty qadaǵalaý deńgeiinde dep aitsam, artyq emes. Ony ózderińiz de kórip otyrsyzdar. Dúniejúzinde jaǵdai qalai bolyp jatqanyn bilesizder», - dedi Eraly Toǵjanov.
