Saýd Arabiiasynyń týrizm ministrligi 28 aqpanda Qytai, Italiia, Ońtústik Koreia, Japoniia, Malaiziia, Singapýr jáne Qazaqstan azamattaryna elektrondy túrde týristik viza berýdi toqtatty. Qazaqstannan basqa altaýynda koronavirýs tabylǵan. Bul tizimge Qazaqstannyń ený sebebi belgisiz. Qazaqstannyń syrtqy ister ministrligi ázirge túsinikteme bermedi.
Saýd Arabiianyń týrizm ministrliginiń habarlaýynsha, ýaqytsha shara koronavirýs taralýyn toqtatý úshin jasalǵan. Buǵan deiin berilgen vizalardyń kúshi joiylmaq.
"Tizimge engen memleket azamattary Saýd Arabiiasy áýejaiyna kelgen kezde de týristik viza ala almaidy" delingen ministrlik habarlamada.
Resmi derek boiynsha, Saýd Arabiiasynda koronavirýs tabylmaǵan. Alaida virýs Taiaý Shyǵys elderinde, onyń ishinde Iranda jyldam tarap barady. Sońǵy derek boiynsha, munda COVID-19 virýsynan 26 adam kóz jumǵan.
Iranda minájat etýshiler kóp baratyn Kým qalasynda da koronavirýs tabylǵan. Bul jaqqa qulshylyq jasaý úshin kelgender ádette dini oryndardy ustap, ernin tigizedi.
27 aqpanda Saýd Arabiiasy jyl saiyn álemniń túkpir-túkpirinen milliondaǵan adam qajylyq sapar jasaityn Mekke men Mádinaǵa ushatyn reisterdi toqtatty.
Er-Riiadtyń aitýynsha, tizimge enbegen memleket azamattaryna týristik viza beriledi, biraq musylmandar kieli sanaityn qalalar men meshitterge barýǵa shekteý qoiylǵan.
