Prezidenttik jastar kadr rezerviniń forýmynda Prezident elimizdiń ádiletti memleket ári inkliýzivti qoǵam quryp jatqanyna, genderlik teńdikti saqtaý máselesine nazar aýdardy, dep habarlaidy "Ult aqparat".
Prezident memlekettik apparattaǵy áielderdiń úlesi 55 paiyzǵa jýyqtaǵanyna qaramastan, basshylyq quramda bul kórsetkish 39 paiyzdan aspaitynyn aitty jáne osy olqylyqtyń ornyn toltyrýdy tapsyrdy.
"Óz tájiribemnen biletinim, áielderdi qyzmetke tartý kerek. Birinshiden, er adamdar renjimesin, áielder jumysqa óte muqiiat, tiianaqty qaraidy. Er adamdarmen salystyrǵanda, jemqorlyq áreketterge beiim emes. Sybailas jemqorlyqqa qarsy kúres jónindegi agenttiktiń statistikasy soǵan meńzeidi. Saiasi qyzmetkerler arasynda da eleýli teńsizdik baiqalady. Olardyń qataryndaǵy áielderdiń sany 10 paiyzǵa jetpeidi. Memlekettik qyzmettegi jastardyń úlesine qatysty da disproportsiia bar. Memlekettik qyzmettegi áielderdiń, jastardyń jáne múmkindigi shekteýli azamattardyń sanyn kóbeitý kerek. Olardyń, ásirese, basshylyq quramda qyzmet etýine barynsha múmkindik bergen jón", – dedi Prezident.
Qasym-Jomart Toqaev jas mamandardy memlekettik qyzmetke beiimdeý úshin Tálimgerlik institýtyn jandandyrý máselesine basa nazar aýdardy. Sonymen qatar memlekettik qyzmette «komandamen kóshý» úrdisi áli tyiylmai otyrǵanyn synǵa aldy. Osyǵan orai Prezident Ákimshiligine, Memlekettik qyzmet isteri jónindegi agenttikke bul máseleni qatań baqylaýǵa alýdy, mundai áreketterge batyl tosqaýyl qoiýdy tapsyrdy.
"Jalpy, Memlekettik qyzmet isteri jónindegi agenttikke zań júzinde qosymsha quzyret berý qajet dep sanaimyn. Olar elimizdegi kadr saiasatyna konstrýktivti turǵydan yqpal ete alýǵa tiis. Árine, bul Agenttik basshylyǵyna airyqsha jaýapkershilik júkteidi", – dedi Qasym-Jomart Toqaev.
