Qyrǵyzstannyń Osh qalasynda tórt balanyń anasy Zarnigor Zakirovanyń oqiǵasy qoǵamda úlken rezonans týdyrdy, dep habarlaidy ult.kz.
Áieldiń aitýynsha, kúieýi onyń betine qainap turǵan shárbat (tosap shárbaty) shashyp, aýyr kúiik jaraqatyn salǵan. Zardap shegýshi munyń sebebi kúieýiniń ekinshi áiel almaq bolǵany jáne osyǵan bailanysty týyndaǵan otbasylyq janjal ekenin málimdedi.
Oqiǵa 2026 jyldyń 9 naýryzynda bolǵan. Zarnigor Zakirovanyń sózinshe, qyzdary popkornǵa arnalǵan shárbat qainatyp jatqan. Kúieýi qainap turǵan shárbatty úlken ojaýǵa quiyp, qaita qyzdyrǵannan keiin áieliniń betine eki ret shashqan. Saldarynan ol beti men denesiniń birneshe jerinen aýyr kúiik alyp, 27 kún aýrýhanada emdelgen.
Jábirlenýshi kúieýiniń shabýyldan keiin Ózbekstanǵa qashyp ketkenin aitady. Osh qalalyq militsiiasy kúdiktiniń 2 maýsymda ustalǵanyn habarlady. Tergeý málimetinshe, oǵan Qyrǵyzstan Qylmystyq kodeksiniń «Otbasylyq zorlyq-zombylyq» baby boiynsha is qozǵalǵan. Sot kúdiktini bir aiǵa qamaýǵa alý týraly sheshim shyǵarǵan.
Zarnigor Zakirova bastapqyda kúieýin keshirýge daiyn ekenin, alaida ol ortaq úidi ózine nemese tórt balasynyń atyna rásimdep berýi tiis ekenin málimdegen. Áieldiń aitýynsha, basty maqsaty – balalaryn baspanasyz qaldyrmaý. Sonymen qatar ol kúieýiniń týystary tarapynan qysym men qorqytý bolǵanyn da jetkizdi.
Bul oqiǵa Qyrǵyzstanda turmystyq zorlyq-zombylyq máselesin qaitadan kún tártibine shyǵaryp, áleýmettik jelilerde keńinen talqylanyp jatyr. Qoǵam belsendileri men quqyq qorǵaýshylar istiń ádil tergelýin talap etýde.
