QR Premer-Ministriniń orynbasary Eraly Toǵjanov eldegi epidemiologiialyq jaǵdaidyń nasharlaýy qańtar oqiǵalarymen esh bailanysty emestigin aitty, dep habarlaidy QazAqparat.
«Omikron shtamynyń paida bolýy men odan keiingi aýrýdyń kúrt ósýi eldi dúr silkindirgen tártipsizdiktermen bailanysty degen pikir bar. Iaǵni, bilikke adamdardyń úide otyrǵany tiimdi, rasymen de solai ma?», - dep surady jýrnalist Ortalyq kommýnikatsiialar qyzmetinde ótken baspasóz máslihatynda.
«Meniń oiymsha, bul máseleler bir-birimen múldem bailanysty emes. Túrli boljamdar men pikirlerdi emes, naqty faktilerdi qaraý kerek. Búginde barlyq faktiler eldegi koronavirýstyń taralýy kúrt shielenisip bara jatqanyn kórsetedi. Sonymen qatar, koronavirýstyń kúndelikti ósý qarqyny birinshi kezekte omikron shtamymen tikelei bailanysty. Mysaly Nur-Sultan boiynsha júkteme 200 adam bolsa, qysqa merzim ishinde bul kórsetkish myńǵa jetti. Densaýlyq saqtaý júiesine úlken júkteme tústi. Iaǵni, koronavirýstyń osyndai ósý qarqyny naqty qaýip bar ekenin kórsetedi», - dedi Eraly Toǵjanov.
Spiker shekteý sipatyndaǵy barlyq sharalar, birinshi kezekte, azamattardyń ómirin qorǵaýǵa jáne qaýipsizdigin qamtamasyz etýge baǵyttalǵanyn atap ótti.
«Bul máselelerdi aralastyrmaýdy jáne qosymsha tujyrymdar men boljamdarǵa súienbeýdi suraimyn. Qazirgi isterdiń naqty jai-kúiine qaraý kerek. Búgin de sizderdiń aldaryńyzda eldegi epidemiologiialyq jaǵdaidy esh búkpesiz usynyp otyrǵanymyz beker emes. Eshkim eshteńeni jasyryp otyrǵan joq: ashyq rejimde, ashyq formatta aqparatty jetkizip otyrmyz. 13 myń naýqasqa deiingi mundai ósý qarqyny bizde 2020, 2021 jyldary bolǵan joq. Eger másele tek koronavirýstyń jeńil formasymen bailanysty bolsa, bul máseleni kótermes te edik. Biraq densaýlyq saqtaý júiesiniń shamadan tys júktelgendikten, naqty sharalar qabyldaýymyz kerek», - dedi Eraly Toǵjanov.
