Eýropa keńesi úsh jyl ishinde Grýziia, Moldova men Ýkrainanyń qorǵanys salasyn kúsheitip, áskeri kómek berý sharalaryn maquldady, dep habarlaidy Azattyq.
Eýropa beibitshilik qory aiasyndaǵy sharalar atalǵan elderdegi "ishki turaqtylyqty" qamtamasyz etýge baǵyttalǵan jáne baǵdarlama aiasynda adamdardy qyryp-joiatyn qarý túrleri tasymaldanbaidy. Eýropa keńesiniń 2 jeltoqsandaǵy málimdemesinde osylai dep jazylǵan.
Aqparatqa qaraǵanda, Grýziia qarýly kúshteri "daǵdarys nemese tótenshe jaǵdai kezinde azamattarǵa kómektese alýy úshin" 12,75 mln eýro (14,45 mln dollar) kóleminde kómek alady. Qoldaý baǵdarlamasy aiasynda meditsinalyq jáne injenerlik jabdyqtar, sonymen birge "azamattyq maqsattaǵy qozǵalys quraldary" jetkiziledi.
Moldovaǵa meditsinalyq jáne injenerlik qyzmet áleýetin arttyrýǵa 7 mln eýro (7,9 million dollar) kóleminde kómek beriledi. Qarajat gospitaldardy meditsinalyq jabdyqtarmen qamtamasyz etýge jáne jarylǵysh zattardy joiatyn injenerlik brigadalarǵa arnalǵan qurylǵylar alýǵa jumsalady.
Ýkrainaǵa "el ishindegi turaqtylyqty arttyrýǵa" jáne "qorǵanys salasyn nyǵaitýǵa" 31 million eýro (35,1 mln dollar) bólinedi.
Eýropa keńesiniń habarlamasy Resei men Ýkraina arasynda jaǵdai ýshyqqan shaqta taralyp otyr. Keiingi kezde Máskeý Ýkrainamen shekarasyna kóp áskerin ornalastyryp, buǵan Kiev pen Batys elderi alańdai bastaǵan. 2014 jyly Resei Qyrymdy anneksiialap, Ýkraina shyǵysynda Kievpen soǵysqan separatisterge dem bergen. Jeti jyl ishinde 13,2 myńnan astam adam qaza tapqan.
Moldova men Grýziia aýmaǵynda da qaqtyǵystar bolyp turady. 90-jyldary Moldovadan bólinip shyqqanyn aitqan Pridnestrovede Reseidiń shamamen 1400 soldaty bar. Resei Grýziiadan "bólinip shyqqan" Ońtústik Osetiia men Abhaziiany da áskeri turǵyda qoldaidy. Kreml baqylaýyndaǵy sanaýly elderdi qospaǵanda, bul eki aimaqqa álem elderi táýelsiz el dep qaramaidy.
