Búgin Túrkistan qalasynda «Rámizder alańy» el igiligine berilip, elimiz boiynsha biiktigi jaǵynan úshinshi alyp tý kóne shahardyń tórinde jelbiredi, dep habarlaidy "Ult aqparat".
Tý tuǵyrdyń biiktigi 62,5 metrdi quraidy. Al, bairaqtyń eni 12 metr bolsa, uzyndyǵy - 24 metr. Azamattardyń týǵan jerge jáne onyń rámizderine degen qurmetin arttyrý, patriottyq rýhyn oiatý maqsatynda salynǵan alańnyń saltanatty ashylýyna oblys ákimi Janseiit Túimebaev qatysty.
«Elbasymyz N.Á.Nazarbaevtyń «Təýelsizdik - Altyn kúmbez deitin bolsaq, sol kúmbezdi tirep turǵan tórt belgi – rəmizderimiz bar. Onyń birinshisi - Eltańba, ekinshisi - Ənuran, úshinshisi - Kók bairaq, tórtinshisi - qazaq tili» degen sózi bar. Sondyqtan Egemendi elimizdiń qasietti nyshandaryn qadirleý – Qazaqstandy – Otanym dep esepteitin árbir azamattyń paryzy dep esepteimin. Rámizder - bizdiń ulttyq arymyz ben namysymyz. Endeshe, búgingi ashylyp otyrǵan «Rámizder alańyna» qurmetpen qarap, namysymyzdy qorǵai bileiik», - dedi oblys ákimi.
Bekzat Sattarhanov dańǵylynyń boiynda salynǵan alańda Qazaqstan Respýblikasynyń Memlekettik Rámizderi kórinis tapqan jáne eldik muratty meńzegen Elbasy men qazaq eli qairatkerleriniń qanatty sózderi jazylǵan arnaiy tas taqtalar sap túzegen. Nysannyń qurylysyn «Túrkistan Jaryq Tazalyq» JShS-i júrgizgen. Rámizder alańyn salýǵa jergilikti biýdjetten 230 million teńge kóleminde qarjy bólinip, sol aqsha tolyǵymen igerilip, abattandyrý jumystary júrgizildi. Onda túrli kishi arhitektýralyq formalar men sý burqaǵy, besedkalar, oryndyqtar, ýrnalar, gazondar men gúl klýmbalary ornatylyp, dekorativti aǵashtar otyrǵyzylǵan.
