Jaiyq ózeninde muzdyń erýine bailanysty qyrylǵan balyqtar jaǵaǵa shyǵyp qalyp jatyr. Osyǵan bailanysty Energetika ministrligi óli balyqty jinaý baǵytynda jedel jumys atqarý kerektigin alǵa tartyp otyr, dep habarlaidy "Ult aqparat".
«Ózderińiz biletindei, byltyr jeltoqsan aiynda Jaiyq ózeninde balyqtardyń jappai qyrylýyna bailanysty arnaiy vedomstvoaralyq komissiia qurylǵan edi. Ol komissiianyń tóraǵasy men. Sol komissiianyń músheleri búgin arnaiy kelip otyrmyz. Sebebi, qazir kún jylyp, Jaiyq ózeniniń muzy erip jatyr. Ólgen balyqtar sý beti men jaǵaǵa shyǵyp jatyr. Búgin biz katerge otyryp, Damby aýylyna bardyq. Vodolazdar ózenniń túbinen videotúsirilim jasady. Keibir BAQ ózenniń túbinde ólgen balyqtardyń óte kóp jatqanyn jariialaǵan edi. Anyqtaǵanymyzdai, sýdyń túbinde ólip jatqan balyqtardy kórip otyrǵan joqpyz», - deidi QR Energetika vitse-ministri Sábit Nurlybai Atyraý oblysymen tikelei beinebailanys arqyly OKQ-da ótken telekópirde.
Vitse-ministrdiń aitýyna qaraǵanda, sýdyń sapasyn tekserý úshin sý men balyqtyń synamasy alynǵan.
«Biz sonymen birge «Amangeldi» balyq sharýashylyǵyna baryp qaittyq. Olar birneshe kúnnen beri balyq aýlap jatyr eken. Aýlap jatqan balyǵyn kórsek, tiri. Árine, tormen aýlanǵan balyqtyń ishinde ólisi de bar. Ózenniń jaǵalaýynda balyqshylarmen de sóilestik. Olar balyqtyń baryn aityp otyr», - deidi Sábit Nurlybai.
Jalpy, osy máselege bailanysty halyqqa alańdaýǵa bola ma? Uzyn-sonar suraq-jaýaptan keiin Sábit Nurlybai osy saýalǵa bylaisha jaýap berdi.
«Jaǵdaidyń qandai ekenin óz kózimizben kórý úshin Atyraýǵa keldik. Jalpy, jaǵdaidy baiqadyq. Bizdi eń aldymen sýdyń sapasy alańdatqan edi. Biraq, búgin Qoǵamdyq densaýlyq saqtaý komitetiniń tóraǵasy Jandarbek Bekshin birneshe ret sýdyń sapasy jaǵynan másele joqtyǵyn alǵa tartty. Kelesi másele: bizde ólgen balyqty joiýda problema bar. Búgin Jaiyq ózeniniń jaǵasynda ólgen balyqtyń shyǵyp qalyp jatqanyn kórdik. Sol sebepti, ákimdik jastar jáne eriktilermen birige otyryp, bul ólgen balyqty dereý jinap, joiýy kerek. Sebebi, bul jumys óte mańyzdy másele. Sonda ǵana halyqta alańdaýshylyq bolmaidy. Qazir muz eridi de óli balyq sý betine shyǵyp qaldy. Álbette, mundai jaǵdai halyqty alańdatatyny túsinikti. Sol sebepti, ákimdik bul rette jedel áreket jasaýy kerek.
Biz zertteýlerdiń qalai júretinin baqylap, keiin halyqqa Jaiyq ózenindegi jaǵdai boiynsha aqparat beremiz», - deidi Sábit Nurlybai.
Óz kezeginde Atyraý oblysy ákiminiń orynbasary Álibek Náýtiev 7 naýryzdan bastap Jaiyqtyń muzy eri bastaǵanyn atap ótti.
«Osyǵan bailanysty shabaqtardyń ólekseleri jaǵaǵa shyǵa bastady. 7 naýryzdan bastap shabaqtardy jinaý jumystaryn júrgizip jatyrmyz. 10 naýryz kúni senbilik uiymdastyryldy. 16 naýryzda qalalyqtar bolyp senbilikke qaita shyǵýdy josparlap otyrmyz», - deidi ol.
Esterińizge sala keteiik, buǵan deiin Atyraý oblysynda balyqtyń qyrylǵany týraly birneshe aqparat jariialaǵan bolatynbyz. Naqtyraq aitqanda, ótken jyldyń jeltoqsan aiynyń basynda Atyraý qalasynyń syrtyndaǵy Peretask shaǵyn ózeninde balyqtardyń jappai qyrylý oqiǵasy tirkelgen edi.
