Energetika ministrligi Reseiden josparly elektr importyn jolǵa qoimaqshy. Bul týraly ministr Bolat Aqsholaqov ortalyq kommýnikatsiialar qyzmetinde ótken brifingide aitty, dep habarlaidy QazAqparat.
«Biz qazir Resei Federatsiiasymen elektr energiiasynyń josparly importy týraly kelisimge kelmekshimiz. Óitkeni buǵan deiingi importtar tehnikalyq aǵyn arqyly jetkizilip kelgen edi. Reseilik áriptesterimizben josparly importtyń kólemi qansha bolatyny týraly kelissóz júrgizip jatyrmyz. Dál qazirgi jaǵdaidy aitsaq, Qarjylyq monitoring agenttigimen, energetikalyq qadaǵalaýshy organmen birge zańsyz jalǵanyp alǵandardy, qara maining sýbektilerin anyqtaý jumystary júrgizildi, júrgizilip te jatyr. Júiege aitarlyqtai elektr qýatyn qaitara aldyq. Shamalap aitsaq, 300 MVt zańsyz tutynylyp kelgen energiia anyqtaldy. Bul jumys jalǵasyp jatyr. Taǵy tutynýy shektelgen sýbektilerde 600 MVt-qa deiin qýat bar. Búginde júie teńgerimge keldi. Aitarlyqtai tapshylyq kórip otyrǵan joqpyz», - degen vedomstvo basshysy Reseiden elektr importtaýdyń sebebin túsindirdi.
«Nege josparly importty oilastyra bastadyq degenge kelsek, birinshi kezekte Ýkraina zaýyttarynan qosalqy bólshekterdi, montajdaý brigadalaryn jetkizý boiynsha máseleler bar. Iaǵni, tap bolýymyz múmkin obektivti problemalar bar. Sondyqtan bul jaǵyna da daiyn bolýymyz kerek. Ekinshiden, ókinishke qarai, bizdegi elektr stansalarynyń qyzmet kórsetý merzimi eskirip barady. Stansalarda apat jiilep ketken. Osyndai olqylyqtarǵa jol bermeý úshin qandai da bir josparly import týraly oilaý kerek bolyp tur», - dedi Bolat Aqsholaqov.
