Foto: Úkimettiń baspasóz qyzmeti
Premer-Ministr Oljas Bektenovtiń tóraǵalyǵymen ótken Úkimet otyrysynda Qazaqstanda atom energetikasyn damytý perspektivalary qaraldy, dep habarlaidy "Ult aqparat" Úkimettiń baspasóz qyzmetine silteme jasap.
Energetika ministri Almasadam Sátqaliev baiandamasynda el ekonomikasynyń turaqty ósýi elektr energiiasyna suranystyń artýymen qatar júretinin atap ótti. Ónerkásip, metallýrgiia, kólik, IT, farmatsevtika, aýyl sharýashylyǵy ónimderin qaita óńdeý jáne basqa da sektorlarda jańa jobalardy iske asyrý úshin qazirdiń ózinde elektr energiiasynyń edáýir kólemi qajet.
"Bul jobalar jańa jumys oryndaryn qurýǵa, ekonomikalyq ósýdi yntalandyrýǵa jáne azamattardyń ál-aýqatyn arttyrýǵa baǵyttalǵan. Alaida olardyń damýy eldegi energiia qýatynyń jetispeýshiligimen shektelýde. Eger jańa turaqty energiia kózderin – jańartylatyn, retteýshi jáne bazalyq qýattardy salý boiynsha shuǵyl sharalar qabyldanbasa, jaǵdai kúrdelene túsýi múmkin", — dep málimdedi Almasadam Sátqaliev.
Búgingi tańda elektr energiiasyn óndirýdiń negizgi úlesi óndiristiń 66%-yn qamtamasyz etetin kómir stansalaryna tiesili. JEK sektory ósimdi kórsetýde: nysandar sany 148-ge jetti, óndiris úlesi shamamen 6%.
Energetika ministrliginiń boljamy boiynsha 2035 jylǵa qarai Qazaqstanda elektr energiiasyn tutyný 152,4 mlrd kVt/saǵ deiin ósedi. Bul rette birqatar obektivti sebepter boiynsha qoldanystaǵy energiia kózderin óndirý 135 mlrd kVt/saǵ-qa deiin tómendeidi. Taiaýdaǵy 10 jylda Qazaqstanǵa jiyntyq qýaty 26,5 GVt jańa óndirýshi qýattardy engizý qajet.
Osy baǵytta tiisti jumystar júrgizilýde. Jeke investitsiialar esebinen jumys istep turǵan elektr stansalaryn jańǵyrtý jáne keńeitý boiynsha 22 investitsiialyq kelisim jasaldy. Ulytaý, Qyzylorda, Túrkistan oblystarynda, Almatyda jalpy qýaty 3500 MVt-tan asatyn manevrli gaz elektr stansalaryn salý boiynsha jobalar portfeli iske asyrylýda. Jańa JEO salý boiynsha sharalar qabyldandy. Sonymen qatar ekonomika men halyqtyń ósýin eskere otyryp, elektr energiiasynyń bolashaq tapshylyǵyn qanaǵattandyrý úshin qolǵa alynatyn sharalar áli de jetkiliksiz. Ministrdiń aitýynsha, álemdik tájiribe kórsetkendei, atom elektr stansasyn salý – shyǵatyn qýattardy aýystyrý jáne Qazaqstannyń energiiaǵa táýelsizdigin qamtamasyz etý úshin jalǵyz durys sheshim sanalady.
