Foto ashyq derekkózden alyndy
Energetika ministri Almasadam Sátqaliev ShQO-nyń Zaisan aýdanyndaǵy gaz kenishiniń keleshegi týraly pikir bildirdi, dep habarlaidy Kazinform agenttigi.
«Ol jerde jeke kompaniia gaz kenishin igerip jatyr, qazir óndirýdiń aqyrǵy kezeńinde. Atalǵan aýdannyń qajettiligin barynsha qamtamasyz etý úshin kompaniiaǵa gazdy eksportqa shyǵarýǵa tyiym salynǵanyn bilesizder. Eksport baǵyty toqtatyldy. Búkil gaz tek ishki qajettilikke jumsalyp jatyr», — dedi ministr Aqordadaǵy Qazaqstan men Frantsiia prezidentteriniń kezdesýinen keiin.
Onyń sózinshe, kenishti igerýdiń tehnikalyq qyzmeti jaǵynan problemalar bar.
«Energetika ministrligi tarapynan gaz jelisiniń ielerine eskertý jasalǵan. Taiaýda ol jaqqa ministrliktiń komissiiasy baryp, atalǵan aktivterdiń daiyndyǵyn tekseredi. Keshe oblys basshysymen sóilestik. Parlament depýtattary da osy máseleni kóterip otyr. Ol jerde qazir tek bir ǵana kompressor jumys istep tur. Qosymsha kompressor joq. Iaǵni qazirgi jalǵyz kompressor isten shyqsa, gazben qamtý jaǵynan másele týyndaýy múmkin.
Gaz kenishinde shynymen igerýdiń aqyrǵy satysy júrip jatyr. Keleshekte gazdy basqa kózderden jetkizý jóninde jospar bar», — dep atap ótti Almasadam Sátqaliev.
