Búgin QR Energetika ministri Qanat Bozymbaev Pavlodar oblysyna jumys saparymen baryp, naryqty kómirmen qamtamasyz etýge qatysty jiyndar ótkizdi, dep habarlaidy "Ult aqparat".
Sapar barysynda ministrliktiń, Pavlodar oblysy ákimdiginiń ókilderi Ekibastuz kómir alabyn aralap ótti (kómir razrezderi: «Maikýben-Vest» JShS, «Bogatyr kómir» JShS jáne «Vostochnyi»).
Kómir razrezderin aralaǵannan keiin Ekibastuz qalasynyń ákimdiginde kómir óndirý kólemi jáne elimizdiń kómir óndiretin kásiporyndaryn damytý máseleleri boiynsha jinalys ótkizildi. Jinalysqa Ministrliktiń, Ákimdiktiń, «Qazaqstan Temir Joly» UK AQ ókilderi, «Maikýben Vest» JShS, «Bogatyr kómir» JShS, «EEK» AQ, «Shubarkól kómir» AQ jáne «Qarajyra» AQ kómir razrezderiniń basshylary qatysty.
Jinalys barysynda vedomstvo basshysy Q. Bozymbaev kommýnaldyq-turmystyq qajettilikke jáne halyqqa kómir jetkizý jumystaryna tiisti baqylaý júrgizilmegendikten anomaldi qatty aiaz kezinde birqatar óńirlerdiń daiyndyqtarynyń jetkiliksizdigin kórsetkenin aitty.
«Halyqty kómirmen qamtamasyz etý máseleleri jergilikti atqarýshy organdardyń quzyretine jatady. Kómir óndiretin kásiporyndar «Qazaqstan Temir Joly» UK AQ birlesken túrde kommýnaldyq-turmystyq sektordyń jáne halyqtyń qajettiligin tolyq jáne ýaqtyly qamtamasyz etýleri qajet», - dep atap ótti Q. Bozymbaev.
QR Energetika ministrligi kommýnaldyq-turmystyq qajettilikke kómir jetkizýdi arttyrý jáne kómir salasyn budan ári damytý úshin birqatar sharalar qoldanyp jatyr.
Vedomstvo Úkimetke óńirlerge kómir jetkizý kezindegi kidirister máselesin túpkilikti bir jolǵa qoiatyn birqatar usynystardy engizýdi josparlap otyr. Razrezderden kómirdi jóneltý syzbasy qaita qarastyrylady. Kómirdi halyqtyń kommýnaldyq-turmystyq qajettiligine jetkizý basty orynda turatyndyǵy, sodan soń otynnyń jylý elektr stantsiialaryna jóneltiletindigi, al eń sońynda eksportqa shyǵarylatyndyǵy jóninde aitylyp ótti.
Qazirgi tańda kóliktik infraqurylymǵa jáne Eýraziialyq ekonomikalyq odaqqa múshe-memleketter porttaryna diskriminatsiiaǵa ushyramaǵan ruqsatnama berýdi qamtamasyz etý arqyly eksporttyq jetkizýdi keńeitý boiynsha jumystar jalǵastyrylýda. Finliandiiaǵa jáne Japoniiaǵa eksport keńeidi, sondai-aq Eýropa jáne Ońtústik-Shyǵys Aziia elderi qyzyǵýshylyq tanytýda.
6 aqpanǵa deiingi jaǵdai boiynsha elimizdiń barlyq oblystarynda halyqtyń kommýnaldyq-turmystyq qajettiligine kómir jetkilikti. Pavlodar, Soltústik Qazaqstan, Aqmola, Qaraǵandy, Qostanai, Qyzylorda oblystaryndaǵy qoimalarda jáne temirjol tuiyqtarynda kómir bar, halyqtyń qajettiligi qanaǵattanarlyq deńgeide. Ońtústik Qazaqstan oblysynyń Shymkent, Túrkistan, Lengir, Saryaǵash qalalarynda jáne óńirlerde kómir bar. Barlyǵy oblys qoimalarynda 19 000 tonna kómir jinaqtalǵan.
2018 jyldyń qańtar-aqpan ailaryna qatysty kómirdi óndirý jáne jóneltý týraly jedel málimet
Kómirdi óndirý:
2018 jyldyń qańtar aiynda Kómir óndirýshi kásiporyndar 9,3 mln tonna kómir óndirdi.
Birqatar kómir óndirýshi kásiporyndar kómirdi óndirý kólemin 2017 jylǵy qańtar aiymen salystyrǵanda óndirilgen kómir kólemin arttyrdy, al keibir kásiporyndar kerisinshe azaitty:
- «Bogatyr kómir» JShS – 222,1 myń tonnaǵa artyq óndirdi nemese 2017 jylǵy sáikesinshe kezeńimen salystyrǵanda 106%.;
- «Qarajyra» AQ – 76,1 myń tonnaǵa artyq óndirdi nemese 2017 jylǵy sáikesinshe kezeńimen salystyrǵanda 111%;
- «Vostochnyi» razrez – 71,9 myń tonnaǵa artyq óndirdi nemese 2017 jylǵy sáikesinshe kezeńimen salystyrǵanda 105,2%;
- «Shubarkól Premiým» JShS – 35 myń tonnaǵa artyq óndirdi nemese 2017 jylǵy sáikesinshe kezeńimen salystyrǵanda 136,4%;
Kómirdi jóneltý:
Aǵymdaǵy jyldyń qańtar aiynda energetika salasyna 6,7 mln tonna kómir bólindi.
Kommýnaldyq-turmystyq qajettilikke jáne halyqqa 838,6 myń tonna kómir bólindi.
Aqpan aiynan bastap jedel málimetke sáikes 1,9 mln tonna kómir óndirildi.
Sondai-aq, energetikaǵa – 1,5 mln tonna, kommýnaldyq-turmystyq qajettilikke jáne halyqqa – 225,6 myń tonna, al eksportqa 343,1 myń tonna kómir bólindi.
