Foto: ashyq derekkóz
Qazaqstandyq elektr energetikasy Qaýymdastyǵy elimizdegi energetika infraqurylymyn jańǵyrtýdyń Ulttyq jobasynda jylý elektr stansalary men kommýnaldyq jelilerdi júielep alýdyń negizgi baǵyttaryn aiqyndady. Energetika sektorynda jyldar boiy qordalanyp qalǵan máseleni sheshýdi qolǵa alǵan Úkimet baǵytyn Qaýymdastyq ta qoldap otyr.
Ekibastuz men Ridder qalasynyń jylý elektr stansasynda bolǵan apat elimizdegi jylý qazandyqtarynyń qandai deńgeide ekendiginen habar berdi. Tozyǵy jetken qazandyqtarǵa jóndeý jumystary júrgizilmei kelgeni belgili. Mamandardyń aiýtynsha, 2015 jyldan bastap Qazaqstanda qýat kózin óndiretin stansalarǵa tarif úsh jyl boiy bir qalypta saqtaldy. Saldarynan jóndeý jumysyn iske asyrýǵa qarjy tapshylyǵy paida boldy. Onymen qosa 2018 jyly elektr energiiasyn óndirip otyrǵan stansalarǵa tarifti 25 paiyzǵa birden tómendetýdiń saldary salanyń damýyn tejep tastady deidi mamandar. 2022-2023 jyldyń ózinde tarif deńgeii 2018-2019 jyldardyń deńgeiine sáikes bolǵan. Osy sheshimder stansalardyń jumysyna keri áserin tigizgen.
"Qazir “tarifti investitsiiaǵa aiyrbastaý” degen joba jumysyn bastady. Joba aiasynda elektr jáne jylý óndirýshilerge qomaqty qarjy qarastyrylady. Ekinshiden, byltyr 25-shi jeltoqsanda energetikalyq infraqurylymdy damytýdyń Ulttyq jobasy bekitildi. Bul tarihta buryn sońdy bolmaǵan oqiǵa. Joba aiasynda shamamen 13 trln teńgege deiin qarajatqa 5 jyl ishinde búkil Qazaqstan boiynsha jylý jelilerin, jylý qubyrlaryn jáne elektr jeliler qalypqa keltirý kózdelip otyr. Atap aitqanda 1622 shaqyrym jylý jelisi, sonymen qatar energetikalyq nysandarǵa jańa jylý júieleri qosylatyn bolady. Bul rette aimaqtarǵa basymdylyq beriledi. Óitkeni óńirlerde jeliler 65-70 paiyzǵa tozyp ketken. Jalpy osy joba aiasynda tozý deńgeiin kem degende 20 paiyzǵa deiin azaitýdyń baǵdarlamasy bekitildi. Ashyǵyn aitqanda osy joba negizinde tarifter shamamen 2 esege deiin ósedi degen boljam bar. Sonyń negizinde qarajat kózin ulǵaityp, mamandar jalaqysyn kóterý jáne jóndeý jumystarynyń kólemin arttyrý máselesi tur", - deidi Qazaqstandyq elektr energetikasy Qaýymdastyǵynyń Tóraǵasy Talǵat Temirhanov.
Qymbatshylyq qysqan kezeńde jylý jáne elektr enegiiasynyń tólemi ulǵaiatyn bolsa, turmysy tómen, az qamtylǵan otbasylary úshin ońaiǵa túspesi anyq. Talǵat Temirhanovtyń aitýynsha Ulttyq joba aiasynda halyqtyń az qamtylǵan bóligine arnalaǵan arnaiy júieniń iske qosylatyndyǵyn jetkizdi.
"Ulttyq joba nemese tarifti investiiaǵa aiyrbastaý jobasy aiasynda az qamtylǵan azamattardyń shyǵyndaryn azaitý maqsatynda jergilikti atqarýshy organ kommýnaldyq qyzmetter úshin azamattardyń shyǵyndarynyń bir bóligin óteý tetigin iske asyratyn bolady. Ózgeriske sáikes azamattar otbasylyq tabysynyń 10 paiyzdan aspaityn bóligin turǵyn úi qyzmetterin tóleýge jumsaidy. Bul azamattardyń toqsan saiynǵy alatyn ótamaqy mólsherin ulǵaitýǵa múmkindik beredi. Atap aitqanda tutynýshylardyń áleýmettik jaǵdaiyna bailanysty jergilikti ákimdikten tiisti kómek suraýǵa múmkindik bolady. Osy jyldyń ortasynan bastap bul jumys retke keltiriledi", - dedi Temirhanov.
Talǵat Temirhanovtyń aitýynsha, Ulttyq joba turǵyn úi kommýnaldyq infraqurylymyn jańǵyrtyp qana qoimai, jalpy memlekettiń turaqty damýyna jol ashady deidi.
