Foto ashyq derekkózden alyndy
Úkimet jeńildetilgen nesiemen kólik alý baǵdarlamasyna endi qarajat salmaidy. Bul týraly Premer-ministrdiń orynbasary Roman Skliar Senattaǵy parlamenttik tyńdaýdan keiin málim etti, dep habarlaidy Azattyq Ruhy portaly.
Aita keteiik, osyǵan deiin Úkimet bul baǵdarlama úshin biýdjetten - 88 mlrd teńge, ýtilizatsiialyq alymnan jinalǵan qarajattan 100 mlrd teńge salǵan edi.
«Osylaisha, baǵdarlamanyń ainalymynda 188 mlrd teńge jatyr. Baǵdarlamaǵa degen suranys árine joǵary, biraq oǵan salǵan osy 188 mlrd teńge jetkilikti. Aldaǵy ýaqytta biz bul baǵdarlamaǵa aqsha quimaimyz. Óitkeni Úkimettiń atqaratyn basqa da mańyzdy mindetteri bar. Baǵdarlama oryndaldy dep sanaimyn», - dedi Skliar jýrnalister suraǵyna jaýap bere otyryp.
Esterińizge sala keteiik, biyl 6 aqpanda osy baǵlarlamaǵa ótinish berý ashylǵan bolatyn. Biraq ókinishtisi, baǵdarlama bastalmai jatyp synǵa ushyrady. Óitkeni jeńildetilgen avtonesie berý baǵdarlamasyna ótinim berý nebári 18 sekýndta aiaqtalyp, kóp azamat ótinish berip úlgermegenin aitady.
