Elektrondy úkimet portalynda dilerden satyp alǵan kólikti bastapqy deńgeide tirkeýge múmkindik beretin qyzmet paida boldy, - dep habarlaidy Koleso.kz.
Avtokólikterdi onlain tirkeý qyzmeti Qazaqstanda óndirilgen kólikter úshin de, el aýmaǵyna importtalǵandary úshin de qoljetimdi. Ony qoldaný úshin dilerlik ortalyq egov.kz portalynda kólik quralyn tirkeýge ótinim berýi tiis.
«Ol úshin portalda avtorlandyrýdan ótip, «Kólik jáne kommýnikatsiialar» bóliminen «Qazaqstan Respýblikasy aýmaǵyndaǵy resmi dilerlerden satyp alynǵan kólik quraldaryn bastapqy tirkeý» degen aidarǵa ótip, «Onlain suraý» batyrmasyn basý qajet. Artynsha «Shanaq nómirin» engizesiz. «Shanaq nómiri» sátti tekserilgen soń ótinimdegi barlyq mindetti joldardy toltyrý kerek. Osydan keiin qajetti qujattardy tirkeisiz de, suranymda kólikti satyp alýshynyń JSN-in engizý qajet. ETsQ (elektrondy tsifrlyq qoltańba) arqyly qol qoiasyz. Sodan soń satyp alýshyǵa rastaýǵa jiberý kerek», - delingen habarlamada.
Ári qarai satyp alýshy «Qyzmetterdi alý tarihy» bólimine ótip, jeke kabinetindegi rásimdelgen suranymmen tanysýy tiis. Artynsha kóligine nómir tańdap, memlekettik baj salyǵy men tirkeý jarnasyn tóleidi de, ETsQ arqyly suranymdy rastaidy. Satyp alýshy daiyn qujattardy ózi turatyn óńirdegi mamandandyrylǵan HQKO-nan alyp kete alady.
