Ózin marketolog jáne prodiýser dep tanystyrǵan 32 jastaǵy kelinshek Ulbolsyn degen esimin Aisha dep aýystyrǵanyn habarlady. Onyń bul áreketi kópshiliktiń nazaryn aýdaryp, alýan túrli pikirge ulasty dep habarlaidy Ult.kz.
Ol óziniń áleýmettik jelidegi paraqshasyna HQKO-da qujattarymen otyrǵanyn kameraǵa túsirip, "Endi men Aisha Rahymjanqyzymyn" dep jazba jariialady.
Foto: Videodan skrinshot
Bastabynda ol tanystary bilsin degen nietpen tek aty-jónin ózgertkeni týraly rils jariialaǵan, biraz ýaqyttan keiin videony óshirmek te bolǵan. Biraq video kóp qaralym jinap, kópshilik onyń tańdaýyn qoldaǵandyqtan óshirmepti.
"Sol úshin alǵys aitamyn — tipti beitanys adamdardyń qoldaýy da kúsh pen senim beredi eken. Múlde tanymaityn adamdardyń men úshin qýanyp jatqanyn kórý — óte jaǵymdy sezim. Árine, syn aitqandar da bar — din men qazaq dástúrin qozǵaityndar bar. Kóptegen qyzdardan hat aldym, olardyń esimderi de «Ul» dep bastalady eken, jáne olar da óz attaryn ózgertkisi keletinin jazdy. Olar meniń mysalymnan «eshqashan kesh emes, unamaityn nárseni ózgertýge bolady» degen úmit kórdi.
Kópshiligi ata-anasyna renishterin de jazdy. Sol kezde men bir úlken máseleni baiqadym: keide ata-analar ózderi baiqamai, qyz balanyń búkil bolashaǵyna, ishki kúiine, minezi men ómirlik ustanymyna áser etetin sheshim qabyldaidy eken.
Sondyqtan men videony óshirmeimin. Kerisinshe, ómirde ózgeristerden qoryqpaýǵa shabyt beretin adam bolýǵa tyrysamyn. Kóp adam qujat rásimdeýdiń mashaqaty men shyǵynynan qorqyp, atyn ózgertýge batpaidy. Biraq ne mańyzdyraq: birneshe saǵat ýaqytyń men birneshe ondaǵan myń teńgeni únemdeý me, álde ishki tynyshtyq pen qanaǵat tabý ma? Menińshe, jaýaby aiqyn", - dep jazdy ol óziniń jazbasynda.
