Eńbek jáne halyqty áleýmettik qorǵaý ministrligi Tsifrlyq damý, innovatsiialar jáne aeroǵarysh ónerkásibi ministrligimen jáne «Ulttyq aqparattyq tehnologiialar» AQ-men birlesip, «Qandas mártebesin berý nemese uzartý» memlekettik qyzmetin tsifrlyq formatqa kóshirdi. Endi ol «Elektrondyq úkimet» (eGov.kz) portalynda qoljetimdi, dep habarlaidy "Ult aqparat" vedomstvonyń baspasóz qyzmetine silteme jasap.
Buryn bul qyzmet Halyqqa qyzmet kórsetý ortalyqtarynda, sondai-aq Nur-Sultan, Almaty, Shymkent qalalarynyń, aýdandardyń jáne oblystyq mańyzy bar qalalardyń jergilikti atqarýshy organdarynda kórsetiletin. Endi qyzmetke eGov.kz portalynda tapsyrys berýge bolady. Ol úshin ótinish berýshiniń JSN men elektrondy tsifrlyq qoltańbasy bolýǵa tiis.
Qyzmetti alý úshin ótinish berýshi barlyq mindetti joldy toltyryp, suratylǵan qujattardy qosa usynýy qajet. Tirkelgen faildar pdf nemese jpg formatynda bolýy kerek.
Ótinim bergen kezde qoldanýshy qandas mártebesin berý nemese uzartýǵa qatysty otbasy músheleri boiynsha da málimetterdi toltyra alady. Bul rette otbasy músheleriniń sanyna shekteý joq. Osydan keiin qoljetimdi tásilderdiń birimen suraý salýǵa qol qoiý qajet.
"Usynylǵan derekter Eńbek jáne halyqty áleýmettik qorǵaý ministrliginiń aqparattyq júieleri arqyly tekseriledi.
Memlekettik qyzmetti kórsetý merzimi – 4 jumys kúni. Nátijesinde ótinish berýshi qandas kýáligin alady nemese jergilikti atqarýshy organ qandas mártebesin uzartý týraly sheshim qabyldaidy. Ótinishte usynylǵan qujattar men málimetter durys bolmaǵan jaǵdaida, qoldanýshyǵa memlekettik qyzmet kórsetýden bas tartylady" - delingen ministrlik habarlamasynda.
Nátijeler elektrondyq qujat túrinde qoldanýshynyń «Jeke kabinetine» jiberiledi.
