Foto: inbusiness.kz
Eńbek jáne halyqty áleýmettik qorǵaý ministrligi tiisti qujattar bolmaǵan jaǵdaida ońailatylǵan tártippen qandas jáne QR azamattyǵy mártebesin alý úshin qazaq ultyna jatatyndyǵyn aiqyndaý qaǵidalaryn ázirledi, dep habarlaidy «Ult aqparat» inbusiness.kz-kesilteme jasap.
Jańa erejege sáikes, azamattardyń ulty qazaq ekenin anyqtaý týraly ótinish "Migration.enbek.kz" portaly, "Qutty meken" mobildi qosymshasy, halyqty áleýmettik qorǵaý jáne jumyspen qamtý máseleleri jónindegi jergilikti atqarýshy organy nemese QR shetelderdegi mekemesi arqyly beriledi.
Kandidattyq mártebesin jáne Qazaqstan Respýblikasynyń azamattyǵyn alý úshin ótinish bildirgen adamdardyń ulty qazaq ekenin anyqtaý úshin jergilikti atqarýshy organmen komissiia qurylady.
Komissiia quramyna halyqtyń kóshi-qony, bilim berý, mádeniet, ishki saiasat, ulttyq qaýipsizdik jáne ishki ister organdary, etnikalyq qazaqtar máselelerimen ainalysatyn úkimettik emes uiymdar jáne qoǵamdyq birlestikter salasyna jetekshilik etetin mamandar, sondai-aq qazaq tili men Qazaqstan tarihy salasyndaǵy mamandar kiredi.
Komissiia qazaq tilin, salt-dástúrin, ádet-ǵurpyn, mádenietin, týystyq qarym-qatynasyn jáne adamnyń ózin etnikalyq qazaq retinde tanýǵa múmkindik beretin basqa da faktorlardy bilýine baǵyttalǵan suhbatty jeke nemese onlain rejiminde júrgizedi. Sodan keiin alynǵan aqparatty taldap, sheshim qabyldaidy.
Ulty qazaq ekenin anyqtaý úshin ótinish berýshi jergilikti organǵa týý týraly kýálikti, ata-anasynyń týý týraly kýáligin, ata-babasynyń Qazaqstan aýmaǵynda turatyny týraly muraǵattyq anyqtamalardy, bar bolǵan jaǵdaida neke qiiý týraly kýálikti usynady.
Odan keiin Komissiia 3 jumys kúni ishinde ashyq daýys berý arqyly ótinish berýshilerdiń ultynyń qazaqtyǵyn anyqtaý nemese anyqtaýdan bas tartý týraly usynym qabyldaidy jáne oǵan qatysqandardyń keminde úshten ekisiniń oń daýsymen qabyldandy dep esepteledi.
