«Atameken» UKP Tóralqasynyń tóraǵasy Timýr Qulybaev naqty aqshalai tabysyna kóńil bólýdi usyndy, dep habarlaidy QazAqparat.
Onyń aitýynsha, sońǵy 4 jylda azyq-túlik baǵasy 37%, ózge taýarlar 42%-ǵa qymbattady. Al halyqtyń naqty aqshalai tabysy nebary 11%-ǵa ósti. Halyq bastapqy qajettilikterge qarajat jetispeýshiligin tutynýshylyq nesie arqyly sheshýge májbúr. Nátijesinde azamattarǵa berilgen nesie kólemi 22%-ǵa nemese 6,2 trln teńgege deiin ósti, al nesieniń jartysynan kóbi kepilsiz berilgen. Sondyqtan mundai nesieleýde úlken syn-qater bar.
«Memleket basshysynyń tapsyrmasymen Úkimet muǵalimder men meditsina qyzmetkerleriniń jalaqysyn kóterý týraly sheshim qabyldaǵanyn bilesizder. 1,6 millionnan asatyn biýdjettik qyzmetkerlerdiń mártebesin kóterý úshin jalaqylaryn kúrt arttyrý qajet. Biýdjettik qyzmetkerlerdiń jalaqy qory 2,2 trln teńgege baǵalanyp otyrǵanyn eskersek, joǵaryda atalǵan ósim úshin úsh jylǵa 2,9 trillion teńge nemese jyl saiyn orta eseppen 1 trln teńge qajet. Sonymen birge, biz azamattardyń kirisiniń ósýine tek biýdjet esebinen qol jetkizýge bolmaitynyn túsinemiz. Eńbekke qabiletti jastaǵy halyqtyń 80% jeke sektorda jumys isteidi. Sondyqtan naqty sektordy damytýǵa basa nazar aýdarý kerek. Munda eki negizgi aspekt bar: qarjy men ótkizýdiń qoljetimdi bolýy», - dedi T. Qulybaev QR Parlamenti Májilisinde ótken depýttarmen kezdesýde.
Onyń aitýynsha, naqty sektordy nesieleýde turalaý baiqalady. Qazirgi ýaqytta bankterdiń nesie portfeli 13,4 trln teńgeni quraidy. Ótken jylmen salystyrǵanda zańdy tulǵalarǵa berilgen nesie kólemi 5,4% tómendegen. Shaǵyn jáne orta biznes nesiesi 12,5% tómendedi. 2018 jyly JIÓ-degi banktik qaryzdardyń úlesi 56,5%-dan 21,2%-ǵa deiin tómendedi. Ortasha kásiporyndardyń sany da azaiyp, negizgi kapitalǵa investitsiia azaiyp keledi.
Sondai-aq, T.Qulybaev 2019 jyldyń qazan aiynda júrgizilgen jedel saýalnama nátijesin aityp, óndiristik kásiporyndardyń 60%-ynda ainalym qarajatyn alýǵa nesie alý problemalary bar ekenin jetkizdi. Bul kóbinese bankterdiń joǵary suranysyna, nesie stavkasynyń joǵary deńgeiine jáne kepildik bazanyń bolmaýyna bailanysty kórinedi.
