Búgin QR Premer-Ministriniń orynbasary Eraly Toǵjanovtyń tóraǵalyǵymen ótken Jumyspen qamtý máseleleri jónindegi vedomstvoaralyq komissiianyń otyrysynda «Eńbek» jáne «Jumyspen qamtýdyń jol kartasy» baǵdarlamalaryn iske asyrýdyń biylǵy 7 aidaǵy qorytyndysy tyńdaldy, dep habarlaidy "Ult aqparat" primeminister.kz-ke silteme jasap.
Eńbek jáne áleýmettik qorǵaý ministrligi «Eńbek» baǵdarlamasy aiasynda jyl basynan beri jumyspen qamtý sharalarymen 335 myń qazaqstandyq qamtylǵanyn habarlady.
Degenmen, birqatar óńirlerde baǵdarlamany iske asyrýdyń qarqyny tómen ekendigi baiqalady: Nur-Sultan qalasynda - shaǵyn nesie, grant berý, jastar praktikasy boiynsha; Almaty qalasynda - jastar praktikasy jáne qoǵamdyq jumystar boiynsha; Atyraý oblysynda - turaqty jumys oryndaryn qurý boiynsha.
Sondai-aq «Jumyspen qamtýdyń jol kartasy» baǵdarlamasy aiasynda 6,3 myń joba iske asyryla bastap, 153 myń jumys orny ashylǵany baiandaldy.
Qostanai oblysynda jumysqa ornalastyrý boiynsha tómen qarqyn tirkeldi; basqa aýdandardan kelgenderge kóterme aqy tóleý boiynsha Almaty qalasynda, Túrkistan jáne Aqmola oblystarynda oryndalmai otyr.
Premer-Ministrdiń orynbasary óńirlerdiń ákimdikteriniń esepterin tyńdap, halyqty jumyspen qamtý boiynsha jumysty jandandyrý jóninde jedel sharalar qabyldaý qajettigin atap ótti.
Sondai-aq otyrysta «Jumyspen qamtýdyń jol kartasy» jobalarynyń tiimdilik ólshemderi bekitildi.
«Memleket basshysynyń tapsyrmasy boiynsha bizdiń aldymyzda Baǵdarlamaǵa bólingen 1 trln teńgeni barynsha tiimdi paidalaný mindeti tur. Árbir joba boiynsha áleýmettik-ekonomikalyq tiimdilik muqiiat baǵalanatyn bolady: qansha jańa jumys orny quryldy, salyq túsimderiniń ósý qarqyny, adamdardyń turmys sapasyna áseri jáne t. b. Baǵdarlamanyń tiimdiligin Úkimet erekshe baqylaýda ustaidy», — dep qorytyndylady E. Toǵjanov.
