QR Eńbek jáne halyqty áleýmettik qorǵaý vitse-ministri Nariman Muqyshev Qaraǵandy oblysyna jumys sapary barysynda Qaraǵandy, Temirtaý qalalarynyń halyqty jumyspen qamtý ortalyqtaryna (HJQO) baryp, onda ataýly áleýmettik kómek taǵaiyndaýdyń jańa qaǵidalaryn túsindirdi.
Bul týraly vedomstvonyń baspasóz qyzmeti habarlaidy.
Vitse-ministr óńirdegi baǵdarlamasyn Temirtaý jáne Qaraǵandy jumyspen qamtý ortalyqtaryn aralaýdan bastady. Jumyspen qamtý ortalyqtarynyń qyzmetkerlerimen áńgimelesý barysynda Muqyshev azamattarmen AÁK taǵaiyndaýdy jańa formatta 2020 jyldyń 1 qańtarynan bastap aldyn-ala pysyqtaý kerektigin aitty.
«Sizder ataýly áleýmettik kómek alýǵa júginetin adamdarǵa AÁK jańa tetigi jan-jaqty memlekettik qoldaý kórsetetinin naqty túsindirýlerińiz kerek. Bul kópbalaly otbasylarǵa beriletin járdemaqy, ár otbasy múshesiniń jan basyna shaqqandaǵy ortasha kirisi óńirlik kúnkóris deńgeiiniń 70%-ynan tómen otbasylarǵa ataýly áleýmettik kómek jáne áleýmettik jaǵdaiy tómen otbasylardaǵy balalarǵa kepildik berilgen áleýmettik toptama», - dedi vitse-ministr.
Nariman Muqyshev AÁK toqsan saiyn taǵaiyndalatyndyǵyn atap ótti.
«Sizder qazir AÁK alýshylarmen túsindirý jumystaryn júrgizip, olarǵa aǵymdaǵy jyly taǵaiyndalǵan AÁK jarty jylǵa nemese bir jylǵa taǵaiyndalǵan bolsa da, 31 jeltoqsanǵa deiin áreket etetini týraly túsindirýińiz óte mańyzdy. Senat qabyldaǵan zańǵa sáikes, 1 qańtardan bastap AÁK jańa erejeler boiynsha taǵaiyndalady. Tiisinshe, osy jyldyń barlyq tólemderin aidyń aiaǵyna deiin iske asyrý qajet. Iaǵni, AÁK-ti kelesi jyldyń qańtarynda emes, osy jyldyń jeltoqsan aiynda tóleý kerek», - dedi ol.
Vitse-ministr, sonymen qatar, AÁK alýǵa ótinish bildirgen azamattar ony taǵaiyndaý úshin qujattardy 2020 jyly tapsyrýy kerek ekenin atap ótti.
«Taǵy da barshanyń 5 qańtarda kelýdiń qajeti joq ekenin, kezek pen ajiotaj qurý qajet emes ekenin túsindirý kerek. Barlyǵynda qujattar tapsyrýǵa ýaqyt bolady. Jeltoqsanda adamdarǵa qarashaǵa jáne jeltoqsanǵa AÁK tólenedi, iaǵni, eki eselengen soma. Adamdarǵa aqsha beriledi. Qańtar aiy ishinde, aqpan aiynda áleýmettik kómek alý úshin kez kelgen adam qujattaryn tapsyra alady», – dep atap ótti Muqyshev.
Qaraǵandy oblysyna eki kúndik jumys sapary aiasynda Nariman Muqyshev, sondai-aq, Jezqazǵan, Abai jáne Sátpaev qalalarynyń halyqty jumyspen ortalyǵyn aralap, halyqpen jáne oblystyq jumyspen qamtýdy úilestirý jáne áleýmettik baǵdarlamalar basqarmasynyń qyzmetkerlerimen kezdesýler ótkizedi.
Qazaqstan Respýblikasy Eńbek jáne halyqty áleýmettik qorǵaý ministrliginiń jaýapty hatshysy Aida Qurmanǵalieva 25 jeltoqsanda elordanyń halyqty jumyspen qamtý ortalyqtaryna baryp, Nur-Sultan turǵyndarymen kezdeseip óńirlerdegi halyqty jumyspen qamtý ortalyǵynyń qyzmetkerlerimen túsindirme jumystaryn jalǵastyrady.
26 jáne 27 jeltoqsanda QR Eńbek jáne halyqty áleýmettik qorǵaý ministriniń birinshi orynbasary Erjan Jylqybaev jáne QR Eńbek jáne halyqty áleýmettik qorǵaý ministrligi Eńbek, áleýmettik qorǵaý jáne kóshi-qon komitetiniń tóraǵasy Erbol Nurǵaliev Shymkent qalasynda jáne Túrkistan oblysynda túsindirý jumystaryn júrgizedi.
27 jeltoqsanda vitse-ministr Erlan Áýkenov Shyǵys Qazaqstan oblysynda túsindirý jumystaryn júrgizedi. 27 jáne 28 jeltoqsanda vitse-ministr Aqmádi Sarbasov jumyspen qamtý ortalyqtarynyń qyzmetkerlerine, jumyspen qamtýdy úilestirý jáne áleýmettik baǵdarlamalardy úilestirý departamentiniń qyzmetkerlerine jáne Aqmola oblysynyń turǵyndaryna AÁK taǵaiyndaýdyń jańa tetikteri týraly aityp beredi.
Buryn habarlanǵandai, QR Premer-Ministriniń orynbasary Berdibek Saparbaevtyń óńirlerge jumys sapary barysynda QR Eńbek jáne halyqty áleýmettik qorǵaý ministri Birjan Nurymbetov Almaty, Shyǵys Qazaqstan, Qaraǵandy, Qyzylorda, Atyraý, Batys Qazaqstan, Túrkistan, Aqtóbe, Pavlodar, Aqmola, Almaty, Soltústik Qazaqstan, Qostanai jáne Mańǵystaý oblystarynyń, sonymen qatar Shymkent qalasynyń turǵyndarymen AÁK taǵaiyndaýdyń jańa tetikteri boiynsha túsindirme jumystaryn júrgizdi.
Esterińizge sala keteiik, osy jyldyń 12 jeltoqsanynda Qazaqstan Respýblikasy Parlamentiniń Senaty 2020 jylǵy 1 qańtardan bastap ataýly áleýmettik kómek kórsetýdiń jańa tetikterin engizýdi kózdeitin «Qazaqstan Respýblikasynyń keibir zańnamalyq aktilerine densaýlyq saqtaý salasyndaǵy mindetti áleýmettik saqtandyrý, áleýmettik qamsyzdandyrý jáne memlekettik-jeke seriktestik máseleleri boiynsha ózgerister men tolyqtyrýlar engizý týraly» zań qabyldady.
Osylaisha, Zańda 2020 jyldyń 1 qańtarynan bastap 4 jáne odan da kóp kámeletke tolmaǵan balalary bar nemese 23 jasqa deiingi kúndizgi oqý bóliminde oqityn stýdentteri bar otbasylarǵa jańa memlekettik járdemaqy engizýdi kózdeidi. Bul járdemaqy otbasynyń tabysyna qaramastan saralanǵan mólsherde taǵaiyndalady: 4 balaǵa - 42 496 teńge; 5 balaǵa – 53 127 teńge; 6 balaǵa - 63 757 teńge; 7 jáne odan da kóp balaǵa – 74 388 teńge.
AÁK usynýdyń jańa tásilderi mynalardy kózdeidi: ár toqsan saiyn ataýly áleýmettik kómek taǵaiyndaý; AÁK taǵaiyndaýdyń qazirgi shekti kriteriin saqtaý - otbasynyń jan basyna shaqqandaǵy ortasha tabys kúnkóris deńgeiiniń 70% -ynan kem bolýy kerek; otbasynyń barlyq músheleri úshin AÁK mólsherin jan basyna shaqqandaǵy kirister men kedeilik sheginiń arasyndaǵy aiyrmashylyq retinde anyqtaý; eńbekke qabiletti azamattarǵa qoiylatyn talaptardy kúsheitý, eger olar jumysqa ornalasýdan bas tartqan jaǵdaida, AÁK tóleý barlyq otbasy úshin toqtatylady; ýchaskelik komissiialardyń osy protsesstegi róliniń kúsheiýimen otbasynyń materialdyq jaǵdaiyna zertteý júrgizý merzimin 3 kúnnen 7 kúnge deiin ulǵaitý.
Kepildik berilgen áleýmettik toptamany usyný aiasynda 1 jastan 6 jasqa deiingi tabysy az otbasylardyń balalary azyq-túlik jiyntyǵymen jáne gigienalyq zattarymen qamtamasyz etiledi, 6 jastan 18 jasqa deiin olar mektepterde ystyq tamaqpen, oqý quraldary men mektep kiimderimen qamtamasyz etiledi, sondai-aq, mektepke deiingi jol júrý shyǵyndary óteledi. 18 jasqa deiingi balalarǵa meditsinalyq kómek, onyń ishinde stomatologiialyq kómek aqysyz meditsinalyq kómektiń jáne mindetti áleýmettik meditsinalyq saqtandyrýdyń kepildendirilgen kólemi aiasynda kórsetiledi.
