Búgin QR Premer-Ministri Asqar Mamin Biliktilik jónindegi ulttyq keńestiń kásiptik standarttar ázirleý máseleleri boiynsha kóshpeli otyrys ótkizdi, dep habarlaidy "Ult aqparat".
«Kásiptik standarttardy ázirleý jumystaryn biz Tuńǵysh Prezident - Elbasy N. Nazarbaevtyń tapsyrmasy boiynsha 2012 jyly bastadyq. Búgingi tańda 480 kásiptik standart ázirlengen. Olar 2,7 myńnan asa kásipti qamtidy. Bizge qazirgi zamanǵy syn-tegeýrinder men eńbek naryǵyndaǵy jyldam ózgeristerge sai keletin kásiptik standarttar men bilim berý baǵdarlamalary qajet. Bul týraly Memleket basshysy Q. Toqaev biyl 17 mamyrda ótken jumyspen qamtý jáne eńbek máseleleri jónindegi keńeste aitqan bolatyn», - dedi kóshpeli otyrysty ashqan Premer-Ministr.
Sonymen qatar Asqar Mamin Memleket basshysy 2020 jyldyń naýryz aiynyń sońyna deiin Jańa kásipter atlasyn ázirleý boiynsha jumystardy aiaqtaýdy tapsyrǵanyn atap ótti. Onyń negizinde eńbek naryǵynyń qajettilikterine sáikes kadrlar daiarlanatynyn aitty.
«Tórtinshi ónerkásiptik revoliýtsiia jańa kásipter men quzyretterdiń týyndaýyna túrtki boldy. Biz buǵan ázir bolýymyz kerek. Sondyqtan bul baǵyttaǵy jumystar áleýmettik áriptestiktiń barlyq tarapynyń - memlekettiń, biznestiń, kásipodaqtardyń úilestirilgen is-qimylyn talap etedi», - dedi A. Mamin.
Otyrysta biliktilikterdiń salalyq negizdemeleri men kásiptik standarttardy ázirleý nátijeleri týraly Eńbek jáne halyqty áleýmettik qorǵaý ministri Birjan Nurymbetov, bilim berý baǵdarlamalary men tiptik oqý josparlaryn ázirleý týraly Bilim jáne ǵylym ministri Ashat Aimaǵambetov jáne basqalary baiandama jasady.
Jiyn sońynda Úkimet basshysy Premer-Ministr «Atameken» ulttyq kásipkerler palatasyna kásiptik standarttardy bekitýdi jyldamdatýdy jáne Bilim jáne ǵylym ministrligimen birlesip bilim berý standarttaryn ózektendirýdi qamtamasyz etýdi tapsyrdy.
«Budan ári jańa kásiptik standarttardy ázirleý bastamasy men tapsyrys naqty óndiristiń qajettilikterinen túsýi tiis. Jumys berýshi ózine qandai maman kerek ekenin anyqtaýy kerek», - dedi Úkimet basshysy.
Sonymen qatar Eńbek jáne halyqty áleýmettik qorǵaý, Bilim jáne ǵylym ministrlikterine «Atameken» UKP-men birlesip, eńbek naryǵyndaǵy jahandyq ózgeristerdi eskere otyryp, suranysqa ie kadrlarǵa turaqty monitoring júrgizý tapsyryldy.
