Elektrondyq eńbek birjasy (EEB) málimetteri boiynsha naýryz aiynda jumys kúshine suranys pen usynystyń teńgerimsizdigi boldy. Bul týraly QR Eńbek jáne halyqty áleýmettik qorǵaý ministrliginen málim boldy, dep habarlaidy QazAqparat.
«EEB málimetteri boiynsha naýryz aiynda jumys kúshine suranys pen usynystyń teńgerimsizdigi baiqaldy. Máselen, eger jalpy naryqta biliktiligi ortasha mamandarǵa suranys basym bolsa (54%), onda osy sanattaǵy usynys bar bolǵany 38%-dy qurady. Bul rette biliktiligi tómen mamandar úshin keri jaǵdai qalyptasyp otyr - suranys 21% bolǵan kezde usynys shamamen 35%-dy qurady. Joǵary bilikti kadrlar úshin túiindemeler men bos jumys oryndarynyń sany teń úlesti quraidy: tiisinshe 26% jáne 25%», – dedi «Eńbek resýrstaryn damytý ortalyǵy» AQ basqarýshy direktory Aleksandra Molchanovskaia.
Jekelegen mamandyqtardy qarastyra otyryp, biyldyń naýryz aiynyń qorytyndysy boiynsha EEB-da óte tapshy meditsinalyq medbikeler men meiirgerlerge, sanitarlar, tárbieshiler men olardyń kómekshileri boldy – bul mamandar úshin qamtylmaǵan qajettilik 4,6 myńdy qurady. Sondai-aq júrgizýshiler (2 myń bos oryn), kúzetshiler (1,6 myń bos oryn), konsýltant-satýshylar (618 bos oryn) jáne elektromonterlar (674 bos oryn) suranysqa ie boldy.
Biliktiligi tómen qyzmetkerlermen qatar, artyq mamandyqtardyń qataryna zańgerler, kýrerler, qarjygerler, dene shynyqtyrý jáne avtomehanika muǵalimderi jatady.
«Osylaisha, EEB málimetteri boiynsha elde jaldaý protsesteriniń jandanýy baiqalady. Sonymen qatar, jumysshylar, kerisinshe, jańa jumys ornyn izdegileri kelmeidi, bul 2022 jyldyń basynan beri jalǵasyp kele jatqan túiindemeler sanynyń azaiýymen rastalady», - dep atalyp ótken vedomstvo habarlamasynda.
Budan buryn habarlanǵandai, 2022 jylǵy naýryzda Elektrondyq eńbek birjasynda 72,7 myń bos jumys orny jáne 48,8 myń túiindeme ornalastyryldy. Ótken aimen salystyrǵanda jariialanǵan bos oryndar sanynyń shamaly ósýi (+0,5%) jáne izdenýshiler tarapynan belsendiliktiń kúrt tómendeýi (-11%) baiqaldy.
