QR Eńbek jáne halyqty áleýmettik qorǵaý ministrligi memlekettik qyzmetterdiń 80%-yn elektrondy formatqa aýystyrdy, dep habarlaidy QazAqparat.
Bul týraly «Eńbek resýrstaryn damytý ortalyǵy» AQ birinshi vitse-prezidenti Erbol Ospanov aityp berdi. Onyń aitýynsha, 2020 jyldyń sońyna deiin ministrliktiń elektrondy áleýmetik qyzmetin 90% jetkizý josparlanǵan.
«Qazirgi ýaqytta áleýmettik-eńbek salasynda 40 memlekettik qyzmet bar. Sonyń 32-si elektrondy túrde kórsetiledi. Onyń 14-i proaktivti, 10 qyzmet - biriktirilgen kompozitti túrde beriledi. Máselen, qazir Altyn alqa, Kúmis alqa ielerine taǵaiyndalatyn járdemaqy nemese múgedektigi bar adamdarǵa járdemaqy usynysy SMS arqyly proaktivti túrde kórsetilip jatyr», - dedi E. Ospanov Ortalyq kommýnikatsiialar qyzmetinde ótken baspasóz máslihatynda.
SMS arqyly qyzmet alý qanshalyqty ońai ekenin jumystan aiyrylǵan jaǵdaida tólenetin álemýettik tólem arqyly kórýge bolady.
«Áleýmettik tólem alý týraly usynys qyzmet alýshynyń smartfonyna SMS-habarlamamen keledi. Oǵan 3 kún ishinde jaýap berýi kerek. 1414 nómirinen kelgen SMS habarlamaǵa talaptarǵa sai jaýap berýi kerek. Bul protsess nebary 10 minýtty ýaqytty alady. Jáne qyzmet alýshynyń qujat jinaý, túrli organdarǵa barý jáne qyzmet alýdy 30 kúnge deiin kútý ýaqytyn qysqartady. Munda tek bir shart talap etiledi - memlekettik qyzmet alýshynyń Halyqqa qyzmet kórsetý ortalyǵyna nemese e-gov elektrondy qyzmet portalyna óziniń telefon nómirin tirkeýi qajet», - dedi spiker.
Sonymen birge, QR Eńbek jáne halyqty áleýmettik qorǵaý ministrligi azamattardy jumyspen qamtý ortalyqtarynda jumys sapasy týraly keri bailanys mehanizmin engizdi. Onda memlekettik jumyspen qamtý ortalyqtarynyń qyzmet alýshylarynyń ótinishterin qabyldaý qarastyrylǵan.
«Bul mehanizm «Tsifrlyq Qazaqstan» memlekettik baǵdarlamasy aiasynda jáne Digital agent mobildi qosymshasy negizinde jumys isteidi. Bul jumyspen qamtý ortalyqtarynyń qyzmet salasyn sypaiy qatynas, qyzmetkerlerdiń kásibi deńgeii, ákimshilik kedergiler, kútý ýaqyty nemese múgedekterge jaǵdai jasaý kriteriileri boiynsha onlain rejimde baǵalanady. Olardyń suranystaryna múmkindiginshe tezirek jaýap alýǵa múmkindik beredi», - dedi Erbol Ospanov.
