Eńbek jáne halyqty áleýmettik qorǵaý ministrligi jumyspen qamtýǵa arnalǵan aqparattyq platforma iske qosylatynyn jariialady, dep habarlaidy Sputnik Qazaqstan.
Vitse-ministr Erjan Birjanovtyń aitýynsha, búginde qyzmet kórsetý salasynda 900 myńǵa jýyq adam jumys isteidi. Biraq kóbisi zańmen qorǵalmaǵan. Sebebi resmi túrde tirkelmegen. Al kelisimshart jasalmaǵannan keiin sotta óz quqyǵyn qorǵai almai jatady. Jańa mobildi qosymsha arqyly bárin zańdy túrde júrgizýge bolady.
"Qazirgi kezde biz platformalyq jumyspen qamtý boiynsha baǵdarlamalyq ónimdi jasadyq. Ony testileýden ótkizip jatyr. Biyl engiziledi. Kaspi qosymshasy bar ǵoi. Týra sol siiaqty jumyspen qamtý platformasy bolady. Máselen, úi jinaý, kúzet, tapsyrysty jetkizý jáne taǵy basqa qyzmetter bar. Jańa qosymshada tirkelgen adam tapsyrysty jyldam taba alady", - dedi Birjanov ortalyq kommýnikatsiialar qyzmetinde ótken onlain brifingte.
Qosymshada tirkelgen jumysshy men tapsyrys berýshiniń quqyqtary zańmen qorǵalady.
"Platformaǵa tirkeletin adam barlyq qajetti málimetterin engizedi. Sonyń ishinde bilimi, kásibi daiyndyǵy jáne taǵy basqa aqparat bar. Biz bárin tekserip tirkeimiz. Al tapsyrys berýshi shaqyrǵan mamannyń jumysyna baǵa bere alady. Osylaisha reiting jasalady", - dep atap ótti Birjanov.
Jańa qosymsha qazan-qarasha ailarynda iske qosylady dep josparlanýda.
