QR Eńbek jáne halyqty áleýmettik qorǵaý ministrligi Qazaqstan Respýblikasynyń zeinetaqy júiesin 2030 jylǵa deiin odan ári jańǵyrtý tujyrymdamasyna ózgerister engizý boiynsha jumystar júrgizip jatyr. Bul týraly atalǵan ministrliktiń alqa májilisinde vedomstvo basshysy Serik Shápkenov málim etti, dep habarlaidy QazAqparat.
Ministr óz sózinde memleket el ekonomikasynyń jaǵdaiyna qaramastan, barlyq áleýmettik mindettemelerdi oryndap jatqanyn atap ótti. Zeinetaqy men járdemaqy ýaqytynda tólenip keledi. Jyl saiyn olardyń mólsheri infliatsiia deńgeiin eskere otyryp indeksteledi.
«2020 jyly halyqqa qosymsha qoldaý kórsetý úshin zeinetaqy men memlekettik járdemaqylar eki ret indeksteldi. Bul ósim 4 million adamdy qamtydy. 2021 jyldyń basynan beri 2,2 millionnan astam zeinetkerdiń yntymaqty zeinetaqysy 7 paiyzǵa kóterildi, bazalyq zeinetaqy men járdemaqynyń ósimi 5 paiyzdy qurady», - dedi S. Shápkenov.
Eńbekmininiń basshysy, sondai-aq, 2020 jylǵy 1 qańtardan bastap Memlekettik áleýmettik saqtandyrý qorynan (MÁSQ) múgedektik, asyraýshysynan aiyrylý jáne jumysynan aiyrylý jaǵdailary boiynsha 131,7 myńnan astam adamǵa tólem orta eseppen 50 paiyzǵa kóbeitilgenin aitty.
2020 jyldyń qorytyndysynda bes áleýmettik táýekel boiynsha 947,2 myń áleýmettik tólem alýshyǵa MÁSQ-tan 257,3 mlrd teńge tólendi.
«Búgingi tańda zeinetaqymen qamsyzdandyrý júiesindegi eń ózekti másele – jinaqtaý júiesin damytý bolyp tur. Jinaqtaýshy júie engizilgen 22 jyl ishinde jinaqtalǵan qarajattyń jalpy somasy 12,9 trln teńgeni qurady (01.01.2021 jylǵy jaǵdai boiynsha). 162 myńǵa jýyq adam zeinetaqy jinaqtaryn aldy, onyń ortasha mólsheri aiyna 28 myń teńgeni quraidy. Oń úrdisterge qaramastan, zeinetaqy jarnalaryn tóleýdiń turaqsyzdyǵy máselesi ózekti kúiinde qalyp otyr», – dedi ministr.
Qazirgi kezde Eńbek jáne halyqty áleýmettik qorǵaý ministrligi 2014 jyly bekitilgen Qazaqstan Respýblikasynyń zeinetaqy júiesin 2030 jylǵa deiin odan ári jańǵyrtý tujyrymdamasyna ózgerister engizý ústinde ekenin atap ótti.
«Másele zeinetaqy júiesin ózgertý jaiynda emes! Ony eń tómengi kepildikter júiesin jetildirý jáne 2023 jyldan bastap jumys berýshilerden mindetti zeinetaqy jarnalaryn engizý bóliginde odan ári jetildirý kózdelýde», – dep túsindirdi Serik Shápkenov.
