QR Eńbek jáne halyqty áleýmettik qorǵaý ministri Birjan Nurymbetov Memleket basshysynyń zeinetaqy jinaqtaryn baspana alýǵa jumsaý usynysyna qatysty pikir bildirdi, dep habarlaidy QazAqparat.
«Qazirgi ýaqytta aldymyzda zeinetaqy jinaǵyn sheship alarlyqtai azamattarda qor jetkilikti me degen másele bar. «Zeinetaqy jinaǵynyń jetkilikti bolýy nemese bolmaýy» degen máseleni eskerý kerek. Iaǵni, bizdiń jinaǵan aqshamyz qartaiǵanda joq degende minimaldy mólsherdegi zeinetaqyny alyp otyrýǵa jetýi tiis. Ol soma shamamen er adamdarǵa 11 million teńge, áielderge 13 million teńge kólemindegi qarajat. Eger dál osy atalǵan somadan artyq aqsha jinaǵan adamdar zeinetaqynyń bir bóligin sheship alýǵa quqyly bolsa, olardyń dál qazirgi tabysy joǵary degen sóz. Al meniń oiymsha, búgingi tańda kerisinshe, bul usynys tabysy tómen otbasylar úshin qoldanylýy kerek degen oidamyn», - dedi Birjan Nurymbetov Úkimet otyrysynan keiin tilshilerdiń suraǵyna jaýap bere otyryp.
Ministr óz sózinde BJZQ-da 10 million adamǵa tiesili 10 trln teńge zeinetaqy qory baryn atap ótti.
«Ortasha alǵanda ár adamǵa 1 million teńgeden (...) Álbette, atalǵan jaǵdaida barlyq táýekelderdi eseptep alý kerek. Sebebi, zeinetaqy jinaǵy – qartaiǵanda paidaǵa jaraityn soma. Búgin onyń bárin sheship alyp, erteńge eshteńe qaldyrmaǵan jaramaidy. Ártúrli nusqa barshylyq. Mańyzdy esepti júrgizemiz degen oidamyn», - dedi Birjan Nurymbetov.
Eske sala ketsek, Qazaqstan halqyna Joldaýynda Prezident Qasym-Jomart Toqaev Úkimetke azamattardyń zeinetaqy jinaqtaryn baspana alýǵa jumsaýyn retteýdi tapsyrǵan bolatyn.
