QR Eńbek jáne halyqty áleýmettik qorǵaý ministri Serik Shápkenov múmkindigi shekteýli balalardyń turǵyn úi kezegine turý quqyǵyna qatysty jańa normany túsindirdi, dep habarlaidy QazAqparat.
«Múgedektigi bar balany baǵyp otyrǵan otbasylar turǵyn úi kezegine tura alady. Eger ol 18 jasqa tolǵanǵa deiin baspanany alyp úlgermese, onyń kezegi joiylyp, qaitadan múgedektigi bar azamat retinde turýy kerek edi. Qazir zań jobasy arqyly biz sol kezektilikti saqtap qalý jónindegi normany engizip jatyrmyz», - S. Shápkenov Ortalyq kommýnikatsiialar qyzmetinde.
«Qazir Parlamentte (Senatta) qaralyp jatqan zań jobasynda tiisti túzetýdi engizdik. Eger bala kezinen kezekte tursa, sol kezek saqtalyp qalady. Bul qadamdar zań jobasynda eskerilgen. 2025 jylǵa deiingi ulttyq josparda múgedektigi bar azamattarǵa qatysty barlyq máselelerdi pysyqtadyq», - dedi ministr.
Onyń aitýynsha, atalǵan zań jobasy biyl qabyldanýy múmkin ekenin atap ótti.
Eske sala keteiik, Parlament Májilisi «Qazaqstan Respýblikasynyń keibir zańnamalyq aktilerine azamattardyń jekelegen sanattaryn áleýmettik qorǵaý máseleleri boiynsha ózgerister men tolyqtyrýlar engizý týraly» zań jobasyn maquldady.
Atalǵan qujatty talqylaý kezinde qujatta múgedektigi bar balany tárbielep otyrǵan otbasylarǵa bala kámelettik jasqa tolǵannan keiin de turǵyn úi kezeginde turý quqyǵyn saqtaý kózdelip otyrǵandyǵy aityldy.
«Is júzinde mundai otbasylar turǵyn úi kezeginde 10 jylǵa deiin turady. Eger bala 18 jasqa tolǵanǵa deiin turǵyn úi alý múmkin bolmasa, onda múgedektigi bar azamat kezekke qaita turýǵa májbúr. Bul norma 20 myńnan astam otbasyna turǵyn úi kezegin saqtaýǵa múmkindik beredi», - dedi Serik Shápkenov.
