QR Eńbek jáne halyqty áleýmettik qorǵaý ministri Birjan Nurymbetov 42500 teńge járdemaqy týraly Arýjan Sainnyń synyna jaýap berdi, dep habarlaidy QazAqparat.
QR Bala quqyqtary jónindegi ýákil Arýjan Sain 42500 teńgeniń balaly otbasyna jetpeitinin, járdemaqyny bala sanyna qarai taǵaiyndaý qajettigin aitqan edi.
«42 500 teńge – elimizdegi jalǵyz áleýmettik tólem emes. Bizde biýdjetten 39 áleýmettik tólem, ai saiyn shamamen 300 mlrd teńge tólenedi. Onyń ishinde 8 járdemaqy men 3 tólem – balaly otbasylarǵa qoldaý kórsetýge baǵyttalǵan. Bala týǵanda beriletin tólem, bala kútimi jáne biyl bala sanyna qarai taǵaiyndalatyn jańa memlekettik áleýmettik járdemaqy engizdik. Búginde 1 mln 700 myńnan astam bala tárbielep otyrǵan 390 myń kópbalaly otbasy osy járdemaqyny alyp otyr», - dep atap ótti ministr Ortalyq kommýnikatsiialar qyzmetinde.
Sonymen birge, ministr tabysy tómen otbasylardyń adam sanyna qarai taǵaiyndalatyn ataýly áleýmettik kómek alatynyn eske saldy.
«Qazirgi ýaqytta 128 myń otbasy nemese 660 myń adam ataýly áleýmettik kómek alady, onyń ishinde 442 myń bala bar. Olar da memlekettiń kepildendirilgen áleýmettik paketin alady. Sondyqtan, balaly otbasylarǵa áleýmettik tólem saiasaty júzege asyrylyp keledi. Jáne balalarǵa qatysty tólemder ótken jylmen salystyrǵanda 1,5 ese artty. Ótken jyly bul shyǵyndar 372 mlrd teńge bolsa, biyl – 581,5 mlrd teńge bólindi. Degenmen, ár tólemniń negizdemesi bolatynyn túsiný kerek. 42 500 teńge – memlekettiń jumys isteitin azamattarǵa degen az da bolsa kómegi. Eger bir otbasynda birneshe adam jumys istese, tiisinshe árqaisysyna 42 500 teńgeden beriledi», - dedi Birjan Nurymbetov.
