Foto: Úkimet
Premer-ministr Eńbek kúnine arnalǵan «Eńbek adamy – El maqtanyshy» respýblikalyq forýmyna qatysty. Oljas Bektenov Memleket basshysynyń atynan el ekonomikasyn nyǵaitýǵa jáne damytýǵa úles qosqan jumysshy mamandyqtary ókilderine memlekettik nagradalar tabystady, dep habarlaidy Ult.kz.
Forýmǵa qatysýshylarǵa arnap sóilegen sózinde Premer-ministr Prezidenttiń Ulttyq quryltaida belgilep bergen «Adal adam – Adal eńbek – Adal tabys» qaǵidaty búginde Qazaqstan qoǵamynyń damýyndaǵy basty baǵytyna ainalǵanyn atap ótti.
Qazaqstanda Eńbek kúni on jyldan astam ýaqyttan beri atalyp keledi. Biylǵy Jumysshy mamandyqtary jyly aiasynda bul merekeniń mańyzy artyp, qoǵam damýynyń negizi sanalatyn adal eńbekke qurmettiń belgisine ainaldy. Qazir elimizde shamamen 2,5 mln maman eńbek etedi. Olardyń qatarynda shahterler, metallýrgter, pedagogtar, energetikter, meditsina qyzmetkerleri, qurylysshylar, agronomdar, tehnologter jáne basqa da sala ókilderi bar.
Úkimet jumysshy mamandyqtary ielerine árdaiym jan-jaqty qoldaý kórsetip keledi. Óndiristegi eńbek jaǵdaiy jaqsartylyp, ondaǵy úderister avtomattandyrylýda. Tehnikalyq bilim berý júiesi reformalanyp, kásibi standarttar jańartylýda. Ǵylym men óndiris arasyndaǵy bailanys nyǵaiyp keledi.
Jumysshy mamandyqtaryna arnap jaily jaǵdai jasaý baǵytyndaǵy mańyzdy qadamnyń biri – Prezident bastamasymen Otbasy bankinde arnaiy «Naýryz jumysker» baǵdarlamasynyń iske qosylǵany boldy. Búginde bul baǵdarlama arqyly 2 myńnan astam otbasy baspanaly boldy.
Sonymen qatar elimizde tsifrlyq tehnologiialardy damytý – erekshe nazarda.
«Memleket basshysy Qazaqstannyń bolashaǵyn innovatsiialyq damý jolynda kóredi. Ol halyqqa Joldaýynda aýqymdy tsifrlandyrýdy jáne jasandy intellektini belsendi engizýdi basymdyq retinde aiqyndady. Aldyńǵy qatarǵa jańa tehnologiialar shyǵady. Bul – ekonomikalyq ósimge jáne azamattardyń ómir sapasyn odan ári jaqsartýǵa keń múmkindik. Innovatsiialyq sheshimder ónerkásipke, kólik salasyna, meditsinaǵa, bilim berýge jáne basqa da kóptegen salalarǵa engizilýde. Barlyq jasalyp jatqan sharalar qýatty Tsifrlyq Qazaqstandy qalyptastyrýǵa baǵyttalǵan», — dep atap ótti Oljas Bektenov.
Úkimet júrgizip otyrǵan tsifrlyq progreske qol jetkizý jumystary aiasynda kadrlardy daiarlaý jáne kásibi-tehnikalyq bilim berýdi damytý basty nazarda bolyp otyr. Biyl 9-synyp túlekteriniń 100%-y geologiia, mashina jasaý, energetika, kólik, IT jáne basqa da suranysqa ie mamandyqtar boiynsha kolledjderde tegin bilim alýmen qamtyldy. Sońǵy eki jylda stýdentterdiń shákirtaqysy eki esege ósti. Kolledjderde materialdyq-tehnikalyq baza jańartyldy, stýdentterdiń jataqhanamen qamtylýy shamamen 90%-ǵa jetti.
Úkimet azamattarǵa jańa daǵdylardy igerýge jáne básekege qabilettilikti arttyrýǵa barlyq jaǵdaidy jasaýǵa múddeli. Eldiń barlyq óńirinde bilim berý mekemeleri men óndiris oryndary arasyndaǵy yntymaqtastyq nyǵaiyp keledi. Kolledjderdi qamqorlyqqa alǵan kásiporyndardyń sany 8 ese artty, biznespen jasalatyn dýaldy kelisimsharttar sany 2 ese kóbeidi.
Is-shara barysynda Halyqaralyq eńbek uiymynyń bas direktory Jilber Fossýn Hýngbo forým qatysýshylaryna beineúndeý joldady. Ol áleýmettik dialogty qamtamasyz etýde jáne eńbek naryǵynyń inkliýzivti ári turaqty damýyna járdemdesýde sheshýshi ról atqaratyn jumys berýshiler men qyzmetkerlerdiń ókildi uiymdarynyń mańyzdylyǵyn atap ótti. Onyń aitýynsha, búgingi tańda áleýmettik seriktester osy dialogty damytyp, ári qaraiǵy qadamdardy anyqtap, birlesip jumys isteýdi jalǵastyrýda.
Sondai-aq «PARYZ» Ulttyq jumys berýshiler konfederatsiiasy prezidiýmynyń tóraǵasy Jumabek Janyqulov sóz sóiledi.
Forým aiasynda uiymdastyrylǵan kórmede Premer-ministr qazaqstandyq ónerkásip kásiporyndarynyń óndiris protsesine ozyq tehnologiialardy engizý boiynsha júrgizip jatqan jumystarymen tanysty. «QARMET», «Qazaqmys», «Qaztsink» jáne ERG kompaniialary joǵary tehnologiialyq salalarǵa arnalǵan metallýrgiialyq ónim shyǵarý, óndiristerde monitoring júiesin engizý, baiytý fabrikalarynyń tsifrlyq úlgilerin jasaý jáne taǵy da basqa jobalaryn tanystyrdy. Biznestiń bastamalary óndiris úderisterin «aqyldy» basqarýǵa jáne barynsha tiimdilikke qol jetkizýge, sondai-aq kolledjderdi qoldaý arqyly kásibi kadrlardy daiarlaýǵa, onda zamanaýi oqý kabinetteri men sheberhanalardy ashýǵa baǵyttalǵan.
Forým qorytyndysy boiynsha jumysshy mamandyqtary ókilderine memlekettik nagradalar tabystaldy.
Marapattaldy:
«Qurmet» ordenimen
Bahtarbek Júnisov – «Qazaqstan temir joly» UK» AQ «Magistraldyq jeli direktsiiasy» filialy Jol jáne qurylystar departamentiniń zeinetkeri.
III dárejeli «Eńbek Dańqy» ordenimen
Shaihyman Shonanov – «KAZ Minerals Bozshakol» JShS býldozer mashinisi;
Baný Ońalbaeva – «Qazposhta» AQ Jetisý oblysy boiynsha filialy Kerbulaq aýdandyq poshta bailanys torabynyń Ortalyq operatsiialyq ýchaskesiniń basshysy;
Nina Miroshnichenko – «Haidelberg Materialz Qazaqstan» JShS logistika jónindegi menedjeri;
Nurádil Meshanov – «Topar bas energiia taratý stantsiiasy» JShS qazandyq mashinisi;
Gennadii Obraztsov – «Qostanai mineraldary» AQ ekskavator mashinisi;
Gúlziia Avdikerim – «Qarmet Service»JShS tiginshisi;
Aqmaral Aýǵanova – «KAP Technology» JShS býhgalterlik esep jáne eseptilik departamentiniń menedjeri;
Toqtar Janaev – «Altyntau Kokshetau» AQ Kólik basqarmasynyń kólikti shyǵarý jónindegi mehanigi;
Jarylqasyn Quraiyshov – «Taraz metallýrgiia zaýyty» JShS «Metall óńdeý» tsehynyń, mehanikalyq óńdeý ýchaskesinde 6 razriadty tokary.
.jpeg)