2020 jyly eńbek qaýipsizdigin saqtamaǵan 207 laýazymdy adam qyzmetinen bosatyldy. Bul týraly Eńbek, áleýmettik qorǵaý jáne kóshi-qon komiteti tóraǵasynyń orynbasary – QR Bas memlekettik eńbek inspektory Tólegen Ospanqulov aitty, dep habarlaidy QazAqparat.
«2020 jyly memlekettik eńbek inspektorlary 4 439 tekserý júrgizdi. Olardyń barysynda 7 260 buzýshylyq anyqtaldy. Onyń ishinde eńbek qatynastary salasynda – 5 001, eńbek qaýipsizdigi jáne eńbekti qorǵaý boiynsha – 2 096, halyqty jumyspen qamtý boiynsha – 163. Eńbekti qorǵaýǵa bailanysty zańnamanyń negizgi buzýshylyqtary jumyskerlerdi qaýipsiz eńbek jaǵdailarymen qamtamasyz etpeýden, qaýipsiz eńbek tásilderine úiretpeýden, jeke jáne ujymdyq qorǵaný quraldarymen, arnaiy kiimmen jáne arnaiy aiaqkiimmen qamtamasyz etpeýden, eńbekti qorǵaý jónindegi qyzmettiń nemese jaýapty adamnyń bolmaýynan kórindi», - dedi Tólegen Ospanqulov Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, tekserýlerdiń qorytyndysynda jumys berýshilerge 2 614 uiǵarym berilip, 182,2 mln teńge somasyna 1 090 aiyppul salyndy.
QR Bas memlekettik eńbek inspektory sondai-aq jumys oryndaryndaǵy eńbek jaǵdailarynyń naqty kúiin jalpy baǵalaý jáne attestattaý nátijeleri boiynsha eńbekti qorǵaý jónindegi is-sharalar keshenin qoldaný maqsatynda 2020 jyly 3 397 óndiristik nysan attestattaýdan ótkenin aitty.
«Anyqtalǵan buzýshylyqtardy joiǵanǵa deiin memlekettik eńbek inspektorlary 207 laýazymdy adamdy atqaryp otyrǵan qyzmetterinen bosatty. Memlekettik eńbek inspektorlary eńbekti qorǵaý talaptaryn buzý faktileri boiynsha quqyq qorǵaý organdaryna 1 234 material jiberdi, olar boiynsha 173 qylmystyq is qozǵaldy», - dedi ol.
