Respýblikanyń barlyq óńirlerinen kelgen memlekettik eńbek inspektorlary «Qazaqstandaǵy adam saýdasy: eńbekpen paidalanýǵa bailanysty isterdi anyqtaýdyń, tergeýdiń jáne sottarda qaraýdyń qiyndyqtary» taqyryby boiynsha oqytýdan ótýde, dep habarlaidy "Ult aqparat".
Arnaiy kýrstardy QR Joǵarǵy sotymen, QR Ishki ister ministrligimen, QR Eńbek jáne halyqty áleýmettik qorǵaý ministrligimen, QR IIM Qaraǵandy akademiiasymen birlesip, AQSh-tyń Nur-Sultan qalasyndaǵy Elshiliginiń qatysýymen jáne qoldaýymen Quqyq qorǵaý organdary akademiiasy uiymdastyrdy.
«Mundai oqytý Qazaqstanda alǵash ret uiymdastyryldy. Qazzirgi kezde elimizdiń 6 óńiriniń memlekettik eńbek inspektorlary arnaiy daiyndyqtan ótti. Biylǵy jeltoqsan aiynyń ortasynda oqýdy barlyq oblystar men respýblikalyq mańyzy bar qalalardyń memlekettik inspektorlary aiaqtaidy dep josparlanýda», - delingen Eńbek ministrligi málimetinde.
Esterińizge sala keteiik, Memleket basshysy biylǵy Joldaýynda adam quqyqtaryn qorǵaý boiynsha jańa sharalar qabyldaýdyń mańyzdylyǵyn atap ótken bolatyn. Kún tártibinde memlekettik organdardyń úilestirilgen is-qimylyn talap etetin adam saýdasyna qarsy kúres tur. Prezidenttiń aitýynsha, quqyq qorǵaý organdary mundai qylmystardy tergeý rásimin jaqsartýy kerek. Kináliler sot tártibimen qatań jazalanýǵa tiis.
Qazaqstanda adam saýdasyna qarsy is-qimyl boiynsha jumys 2003 jyldan bastap QR Úkimetiniń Adam saýdasyna bailanysty qylmystarǵa qarsy kúres, olardy boldyrmaý jáne aldyn alý jónindegi is-sharalar jospary aiasynda júrgizilýde.
Adam saýdasynyń qurbandary úshin arnaýly áleýmettik qyzmet kórsetý standarty 2016 jyly ázirlendi jáne adam saýdasynyń qurbandaryn anyqtaýdyń úlken úlesi bar óńirlerde: Qostanai, Ońtústik Qazaqstan oblystarynda, Nur-Sultan jáne Almaty qalalarynda «pilottyq» rejimde engizildi. Odan keiingi jyldary Aqtóbe, Shyǵys Qazaqstan, Qaraǵandy, Qostanai, Qyzylorda, Pavlodar, Soltústik Qazaqstan oblystarynda jáne basqa da óńirlerde adam saýdasynyń qurbandaryna arnaýly áleýmettik qyzmetter kórsetildi.
Eńbek ministrligi múddeli organdarmen jáne uiymdarmen birlesip, QR Úkimetiniń Adam saýdasyna bailanysty qylmystardyń aldyn alý, jolyn kesý jáne olarǵa qarsy kúres jónindegi 2021 – 2023 jyldarǵa arnalǵan is-sharalar josparyn ázirleidi.
