Jyl basynan beri memlekettik eńbek inspektorlary 500-den astam jumyskerdiń quqyǵyn qorǵady, dep habarlaidy "Ult aqparat" Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
Baspasóz qyzmetiniń málimetterine qaraǵanda, 1 aqpandaǵy jaǵdai boiynsha Memlekettik eńbek inspektorlary respýblikanyń 44 kásipornynda 890 jumyskerdiń aldynda 159,1 mln. teńgeden astam somaǵa jalaqy boiynsha bereshekti anyqtaǵan.
"Osy kásiporyndardyń basshylaryna oryndalýy mindetti 12 nusqama berilip, 2 mln teńgeden astam somaǵa aiyppul salyndy.
Qabyldanǵan sharalar, sonyń ishinde jalaqy boiynsha bereshekti óteýdiń qatań kesteleri men merzimderin belgileý nátijesinde 516 jumyskerdiń quqyqtary qorǵaldy. Olarǵa 90,2 mln. teńge tólendi" - delingen habarlamada.
