Foto: Túrkistan oblysy ákiminiń baspasóz qyzmeti
Búgin Arysta 1 qazan – Halyqaralyq qarttar kúni merekesi atap ótildi. Qala ákimi Gúljan Qurmanbekova qalalyq Qoǵamdyq keńes tóraǵasy Jebeli Dostanovpen birge birqatar tyl ardagerlerdiń shańyraqtaryna arnaiy baryp, olardy merekemen quttyqtady, dep habarlaidy «Ult aqparat».
Bar ǵumyryn qajyrly eńbek pen eliniń ósip-órkendeýine arnaǵan qarttarǵa qurmet kórsetip, estelik syilyqtar tartý etildi.
Qala basshysy quttyqtaýyn Baiyrqum aýylynda turatyn tyl ardageri Jaqsybai Binashev aqsaqaldyń shańyraǵynan bastady. Sanaly ǵumyryn el damýyna jumsaǵan qariia búginde 5 ul, 3 qyz ósirip, olardan 34 nemere, 15 shóbere súiip otyr. Qariiamen áńgimelesken shahar basshysy aqsaqalǵa uzaq ǵumyr, myqty densaýlyq tiledi.
Kelesi quttyqtaý sózi Qojatoǵai aýylynda turatyn Mádi Polat qariianyń otbasynda jalǵasty. Mereili merekede qala basshysy Gúljan Qurmanbekova Arys qalasynda turatyn batyr ana Oryn Narbekovanyń shańyraǵynda boldy. Oryn áje 6 ul, 2 qyz tárbielep ósirgen altyn qursaq ana.
Kezdesý barysynda qala basshysy ardagerlerimizdiń júrip ótken joly – eldik pen erlik joly ekenin aitty. Anamyzǵa uzaq ǵumyr tiledi.
Óz kezeginde qazynaly qarttar da rizashylyqtaryn jetkizip, barshaǵa beibit te berekeli ómir tiledi.
Sonymen birge, Saryaǵash aýdanynyń ákimi Arman Abdýllaev ǵasyr jasaǵan analardyń shańyraqtaryna arnaiy baryp, merekemen quttyqtady.
Aldymen Qurkeles aýyldyq okrýgi Nurly jol aýylynyń turǵyny 104 jastaǵy Jadyra Keskenbaevanyń úiine barǵan aýdan basshysy altyn qursaqty ájeidi arnaiy merekemen quttyqtap, syi-siiapat tabystap, suhbattasty. Jadyra Keskenbaeva 7 ul-qyzdy dúniege ákelip, qazirgi tańda 35 nemere, 87 shóbere, 15 shópshek súiip otyr.
Odan keiin, aýdan basshysy Saryaǵash qalasynyń turǵyny, úlken áýlettiń uiytqysy bolyp otyrǵan 104 jastaǵy altyn qursaqty ájei Sáýle Saparbaevanyń shańyraǵyna baryp, merekemen quttyqtap, aq oramal jaýyp, arnaiy syilyqtar tabystady. Batyr ananyń 11 ul-qyzynan 39 nemere, 44 shóbere taraǵan.
– Biz eń aldymen analarymyzdy ardaqtaimyz. Sizder ómirdi nurlandyryp, shańyraqqa shattyq nuryn sebesizder. Sizderdiń qoldaýlaryńyz árkimniń júreginde senimdilik uialatyp, shýaq syilaidy. Osy airyqsha qasietterińiz máńgilik saltanat quryp, elge yrys-qut darysyn. Aq jaýlyqty analarymyz qandai qurmetke bolsyn laiyqty. Árqashan, shańyraqtaryńyzdyń berekesi bolyp, úilerińizden jylýlyq ketpesin. Januialaryńyzǵa bereke, birlik tileimin! – dedi aýdan basshysy.
Batyr analarymyz shańyraǵyna arnaiy quttyqtai kelgen aýdan ákimine rizashylyqtaryn bildirip, jastyq shaqtarynan syr shertti. Sondai-aq aýdanymyzdyń damýy jolynda jasalyp jatqan jańa bastamalaryna sáttilik tilep, aq batalaryn berdi.
Sonymen qatar, Túlkibas aýdanynda da 1 qazan – Halyqaralyq qarttar kúni merekesine orai, syn saǵatta halqyna súieý, jurtyna qamqor bolyp kelgen qarttarǵa erekshe syi-qurmet kórsetildi. Aýdan ákimi Nurjan Iztileýov jáne orynbasary Erbol Ormanov júz jasaǵan qariialardyń úilerin arnaiy aralap, merekemen quttyqtady.
Birinshi kezekte aýdan basshysy Maitóbe aýylyna taban tirep, elimizdiń birtýar azamaty, abaitanýshy, filologiia ǵylymdarynyń doktory, professor Mekemtas Myrzahmetulynyń shańyraǵynda bolyp, ǵasyrǵa jýyq jasaǵan qartqa syi-qurmet kórsetti.
Osyndai igi iske máz-meiram bolǵan qariia shynaiy rizashylyǵyn bildirip, Nurjan Jaqsylyqulyna óziniń «Abaitaný» atty on tomdyq jinaǵyn tartý etip, elimizdiń mártebesi biiktep, el-jurtymyzdyń aman bolýyn tilep batasyn berdi.
Sodan soń, aýdan basshysy aýdan ortalyǵyndaǵy ǵasyrdan asa jas jasaǵan Vera Sevirikovanyń shańyraǵynda bolyp, búginde 104 jasqa kelgen anaǵa merekelik quttyqtaýyn jetkizip, syi-syiapat jasady.
Aita keteiik, Túrkistan oblysynda 200 myńǵa jýyq zeinet jasyndaǵy qart pen ardager turady. Onyń 11-i Uly Otan soǵysynyń ardageri bolsa, 3,2 myńnan astamy tyl eńbekkerleri. Sonymen qatar 100 jastan asqan 60 qart azamat turady. Onyń ishinde jasy eń úlkeni – Jetisai aýdanynyń 110 jasqa tolǵan turǵyny Begbaeva Ýngai.
Elimizde jyl saiyn 1 qazan – Halyqaralyq qarttar kúni merekesi keń kólemde atalyp ótedi. Túrkistan oblysynyń ortalyǵy men aýdan, qalalarda da saltanatty is-sharalar uiymdastyrylyp, ardagerlerge qurmet kórsetildi. Óńirdiń belsendi, elge eńbegi sińgen ardagerleri Túrkistanǵa saiahat jasap, arnaiy merekelik jiyndarǵa qatysty.
Aldymen oblys basshysy Darhan Satybaldy jańadan boi kótergen «Dostyq úii» ǵimaratynda óńirdiń áleýmettik-ekonomikalyq damýyna qajyrly eńbek sińirgen ardagerlermen júzdesip, erkin pikir almasty. Óńirdi damytý jumystary men kórsetkishterge toqtalyp, bul igi jetistikterde qazynaly qarttarymyzdyń da úlesi mol ekenin atap ótti. Bir top ardagerdi «Oblysqa sińirgen eńbegi úshin» tósbelgisi men oblys ákiminiń Qurmet gramotasymen marapattady. Olardyń qatarynda jazýshy, qoǵam qairatkeri jáne mádeniet salasynyń ardageri, Túrkistan oblystyq Aqsaqaldar alqasynan jáne Oblystyq ardagerler keńesinen, «Qoǵamdyq kelisim» KMM janyndaǵy Analar keńesinen, sonymen qatar aýdan, qalalardan eńbek ardagerleri bar.
Kezdesý saltanatty is-sharaǵa ulasyp, qazynaly qarttarǵa qurmet kórsetildi. Oblys ákiminiń orynbasary Beisenbai Tájibaev quttyqtaý sóz sóilep, eńbegi elengen ardagerlerge alǵys hat tabystady. Jiyn barysynda birqatar ardager Oblystyq máslihattyń gramotasymen jáne «Amanat» partiiasynyń Túrkistan oblystyq filialynyń alǵys hatymen marapattaldy. «Ardagerler uiymy» respýblikalyq birlestiginiń Túrkistan oblystyq filialynyń tóraǵasy Jeńisbek Máýlenqulov sóz alyp, izgi lebizin bildirdi. Ortalyq keńestiń «Qurmet belgisi» medali men Qurmet gramotasyn, alǵys hattardy tapsyrdy. Aǵa býyn ókilderi merekelik dastarqanda kontsert tamashalady. Oblystyń 150-den astam zeinetker men ardager qatysqan merekelik shara ári qarai kontserttik baǵdarlamaǵa ulasyp, Shámshi Qaldaiaqov atyndaǵy filarmoniia men «Jańa lep» óner ujymy, «Samǵaý» bi toby óner kórsetti.
Túrkistan oblysynda zeinetkerler men qarttardyń áleýmettik jaǵdaiyn jaqsartý baǵytynda júieli jumys atqarylyp keledi. Óńirlerde «Belsendi uzaq ómir súrý» ortalyqtaryn ashý tapsyrylǵan. Osy atalǵan jospardy iske asyrý aiasynda mereke kúni oblysta 17-shi ortalyq ashyldy. Jalpy 80 myńǵa jýyq zeinetker tiisti qyzmettermen qamtylýda. Túrkistan qalasynda osyndai ortalyqtarǵa suranysy kóbeiýine bailanysty shaharda 3 ortalyq zeinetkerlerge qyzmet kórsetýde. Bul ortalyqtarda qariialarǵa barlyq jaǵdai jasalǵan. Oblystyq biýdjet esebinen demalys oryndarynda 8 myńǵa jýyq qariia demalyp, densaýlyǵyn túzeidi. Sol demalys oryndarynyń biri – «Ardagerler úiin» Túrkistan oblysyna kóshirip, kelesi jyly ardagerlerdi qabyldaý kózdelip otyr.
